Gənclər və idman naziri İsveçrədəki görüşlərində Azərbaycanda keçiriləcək yarışlar barədə məlumat verib
Bakı, 22 yanvar, AZƏRTAC
Azərbaycanın gənclər və idman naziri Azad Rəhimov Avropa Olimpiya Komitələrinin (AOK) İcraiyyə Komitəsinin növbəti iclasında iştirak etmək məqsədilə İsveçrənin Lozanna şəhərində səfərdədir.
Gənclər və İdman Nazirliyinin mətbuat xidmətindən AZƏRTAC-a bildiriblər ki, səfər çərçivəsində A.Rəhimov Avropa Olimpiya Komitələrinin prezidenti Patrik Hikki, AOK əlaqələndirmə komissiyasının sədri Spiros Kapralos, Olimpiya Həmrəyliyi Hərəkatının rəhbəri Pere Miro, AOK idarə heyətinin üzvü Kristofe de Keeper ilə görüşlər keçirib.
Görüşlər çərçivəsində “Bakı-2015” birinci Avropa Oyunları zamanı yüksək səviyyədə görülmüş təşkilatçılıq işlərindən söz açılıb və Azərbaycanın qazandığı təcrübəni ev sahibliyi edəcək növbəti ölkə ilə bölüşməsinin önəmi diqqətə çatdırılıb.
Eyni zamanda, görüşdə 2016-cı ildə Azərbaycanda keçiriləcək Dünya Şahmat Olimpiadası, “Formula-1” üzrə Avropa Qran-pri yarışları, eləcə də 2017-ci ildə təşkil ediləcək IV İslam Həmrəylik Oyunlarına hazırlıq prosesi barədə məlumat verilib.
Bölmənin digər xəbərləri
