Gənclərin diqqətini tullantıların idarəedilməsi sahəsinə yönəltmək məqsədi ilə Qalada veloyürüş keçirilmişdir
Bakı, 14 oktyabr (AZƏRTAC). Heydər Əliyev Fondunun təşəbbüsü ilə “Təmiz Şəhər” ASC tərəfindən Qala Dövlət Tarix-Etnoqrafiya Qoruğunda gənclər arasında veloyürüş təşkil edilmişdir.
ASC-dən AZƏRTAC-a bildirmişlər ki, iki mərhələdən ibarət olan veloyürüşdə 50-yə yaxın gənc iştirak etmişdir. Velosipedçilər Qala Tarixi-Etnoqrafiya Muzeyinin qarşısından start götürmüş və qəsəbə ərazisində təyin olunmuş marşrut üzrə hərəkətlərini davam etdirmişlər.
Veloyürüş bitdikdən sonra isə açıq havada iştirakçılar üçün gəzinti təşkil edilmiş, onlara çöl şəraitində sağlam qidalanma ilə bağlı təlim keçirilmişdir. Gəzinti zamanı ətraf mühitin təmiz saxlanılması və tullantıların idarə edilməsi barədə söhbət aparılmışdır. Sonra gənclər ərazini tullantılardan təmizləmişlər.
Aksiya gənclərin diqqətini tullantıların idarəedilməsi sahəsinə bir daha yönəltmək, eləcə də sağlam həyat tərzini təbliğ etmək, insanları ekologiyaya vurulan ziyanın mümkün qədər azaldılmasına çağırmaq, eyni zamanda, gənclərdə həm ekoloji, həm də piknik mədəniyyətini inkişaf etdirmək məqsədi daşımışdır.
Veloyürüş Qala qəsəbəsində Heydər Əliyev Fondunun təşəbbüsü ilə “Təmiz Şəhər” ASC tərəfindən reallaşdırılan “Təmiz Qala” pilot layihəsi çərçivəsində həyata keçirilmişdir.
Bölmənin digər xəbərləri
