“GƏNCLƏRİN SOSİAL TƏŞƏBBÜSLƏRİ” FESTİVAL-MÜSABİQƏNİN NƏTİCƏLƏRİNƏ DAİR TƏQDİMAT MƏRASİMİ
AZƏRTAC xəbər verir ki, oktyabrın 2-də Bakı Dəniz Limanının konfrans zalında “Gənclərin sosial təşəbüsləri” festival-müsabiqənin nəticələrinə dair təqdimat mərasimi keçirilmişdir.
2007-ci il “Gənclər ili” çərçivəsində bu cür müsabiqələrin keçirilməsindən əsas məqsəd dövlət gənclər siyasətinə uyğun olaraq yeni fəaliyyət istiqamətlərini müəyyənləşdirmək, gənclərin ahəngdar inkişafına köməklik göstərmək, onların arasında sağlam həyat tərzini təbliğ etməkdir. Belə layihələr cəmiyyətdə narahatlıq doğuran müxtəlif məsələlərə gənclərin münasibətini öyrənməyə imkan verir.
Gənclər və İdman Nazirliyinin keçirdiyi festival-müsabiqəyə təqdim olunan müxtəlif mövzuları əhatə edən 50-yə yaxın layihənin sırasından 10-u seçilmişdir. Layihədə əsasən narkomaniya və QİÇS-lə, uşaq əməyinin istismarı ilə mübarizə yolları, hərbi xidmətdən yayınan gənclərin maarifləndirilməsi kimi mövzular yer almışdır.
Qalib seçilən 10 layihənin müəllifləri öz layihələrini təqdim etmiş və gördükləri işlərdən danışmışlar.
Qeyd olunmuşdur ki, festival-müsabiqədə respublikanın müxtəlif rayonlarından olan gənclər daha fəallıq göstərmişlər.
Sonda layihələr üzrə qalib seçilən 10 gənc mükafatlandırılmışdır.
Bölmənin digər xəbərləri
