GƏNCLƏRLƏ İŞ ÜZRƏ İCTİMAİ ŞURANIN NÖVBƏTİ İCLASI KEÇİRİLMİŞDİR
Bakı, 12 iyun (AZƏRTAC). İyunun 12-də Gənclər və İdman Nazirliyində qurumun kollegiyası nəzdində fəaliyyət göstərən Gənclərlə İş üzrə İctimai Şuranın növbəti iclası keçirilmişdir.
Gənclər və idman nazirinin müavini İntiqam Babayev bildirmişdir ki, ənənəvi keçirilən iclasın məqsədi müxtəlif sahələrdə çalışan gəncləri birləşdirmək, onların fəaliyyətlərini daha da genişləndirməkdir.
Tədbirdə müzakirə olunacaq məsələlər haqqında məlumat verən nazir müavini 2008-ci ildə gənclərlə iş üzrə bir sıra uğurlu tədbirlərin həyata keçirildiyini xatırlatmışdır. O, İctimai Şuranın fəaliyyətinin daha səmərəli qurulması üçün gənclər təşkilatlarının işinin üst-üstə düşməsi, İctimai Şuranın işlək mexanizminin formalaşdırılması məqsədi ilə müxtəlif istiqamətlər üzrə komissiyaların yaradılmasının zəruriliyini vurğulamışdır.
Tədbirdə komissiyanın yaradılması ilə bağlı hazırlanmış təkliflər, 2010-2013-cü illər üçün gənclərlə bağlı növbəti dövlət proqramının hazırlanması, gənclər təşkilatlarının layihələrinin qismən maliyyələşdirilməsi ilə bağlı növbəti müsabiqənin elan olunması və digər məsələlər müzakirə edilmişdir.
Tədbirdə iştirak edən 100-ə yaxın təşkilatın nümayəndələri gənclər sahəsində yeni işlərin həyata keçirilməsi üçün öz təkliflərini vermişlər.
Bölmənin digər xəbərləri
