GORANBOYDA UŞAQ VƏ AİLƏLƏRƏ DƏSTƏK MƏRKƏZİ AÇILACAQDIR
Mərkəz “Uşaqların xilası” (“Save the children”) və Azərbaycana Birgə Yardım təşkilatlarının əməkdaşlığı ilə “Uşaqlara icma əsaslı dəstək proqram”ı çərçivəsində yaradılmışdır.
2004-cü ildən icra olunan “Uşaqlara icma əsaslı dəstək proqramı”ndan əsas məqsəd xüsusi qayğıya ehtiyacı olan uşaqların cəmiyyətə inteqrasiyasını və onlara icma əsaslı qayğının göstərilməsini təbliğ etməkdir. Proqram çərçivəsində bundan əvvəl Şüvəlan və Mingəçevirdə də müasir tələblərə cavab verən mərkəzlər yaradılmışdı.
Əsasən, imkansız ailələrin uşaqlarının, gənclərin, internatlarda yaşayan və əlil uşaqların, habelə qaçqın və məcburi köçkün ailələrin uşaqlarının cəlb olunduğu mərkəzlər “Azərbaycan Respublikasında dövlət uşaq müəssisələrindən uşaqların ailələrə verilməsi (de-institusionalizasiya) və alternativ qayğı” Dövlət Proqramında (2006-2015-ci illər) nəzərdə tutulduğu kimi, uşaqların ailələrə geri qaytarılmasını təbliğ edir.
