“Görünməyən qəhrəmanlar” müsabiqəsinin qalibləri məlum olub
Bakı, 23 iyun, AZƏRTAC
COVID-19 pandemiyası ilə mübarizə çərçivəsində ölkəmizdə tətbiq olunan xüsusi karantin rejimi nəzərə alınaraq müxtəlif istiqamətlərdə tədbirlər həyata keçirilir. Ailə, Qadın və Uşaq Problemləri üzrə Dövlət Komitəsi də, öz növbəsində, virusla mübarizənin ön cərgələrində dayanan məsuliyyətli və vacib peşələrin əzmkar nümayəndələrinin zəhmətini və fədakarlığını qiymətləndirmək məqsədilə 15 aprel-15 may tarixlərində “Görünməyən qəhrəmanlar” mövzusuna həsr olunmuş “Ən yaxşı yazı” müsabiqəsi elan etmişdi.
Komitəndən AZƏRTAC-a bildiriblər ki, müsabiqəyə təqdim edilən 47 yazı münsiflər heyəti tərəfindən dəyərləndirilib, nəticələr müəyyən olunub.
Qeyd edək ki, müsabiqədə yazıçı, jurnalistlərlə bərabər, bir çox məktəbli də iştirak edib. Bunu nəzərə alaraq münsiflər heyəti tərəfindən 2 nominasiya müəyyən edilib: Yazar və jurnalistlər arasında ən yaxşı yazı; Məktəblilər arasında ən yaxşı yazı.
Nəticələrə əsasən birinci nominasiya üzrə ssenarist, kinoredaktor Rafiq Səməndər, ikinci nominasiya üzrə isə Abşeron rayonu, Saray qəsəbəsi, Azim Müzəffərov adına 2 saylı orta məktəbin 8d sinif şagirdi Səma Quliyeva qalib seçilib.
Qaliblərə diplom və hədiyyələr Ailə, Qadın və Uşaq Problemləri üzrə Dövlət Komitəsi tərəfindən sərt karantin rejimi bitdikdən sonra təqdim ediləcək.
Bölmənin digər xəbərləri
