GÖYÇAYIN İKİ KƏNDİNDƏ MODUL TİPLİ SUTƏMİZLƏYİCİ QURĞU İNŞA EDİLİR
Göyçay, 19 iyun (AZƏRTAC). Göyçay rayonunun kəndlərində əhalinin içməli suya olan tələbatının ödənilməsi üçün mühüm işlər görülür. Rayon icra hakimiyyətindən bildirmişlər ki, artezian quyusunun qazılması üçün yeraltı içməli su mənbəyi olmayan kəndlərdə modul tipli sutəmizləyici qurğular quraşdırılacaqdır. Bununla əlaqədar Ekologiya və Təbii Sərvətlər Nazirliyinin sifarişi ilə rayonun ucqar yaşayış məntəqələrindən olan Bəydövül və Çaxırlı kəndlərində tikinti işlərinə başlanılmışdır. Yaxın günlərdə sutəmizləyici qurğular quraşdırılacaq, küçələrə daşıyıcı su xətləri çəkiləcək və bulaqlar inşa ediləcəkdir. Bu kəndlərin ümumilikdə 4 minə yaxın əhalisi ekoloji cəhətdən təmiz içməli su ilə təmin olunacaqdır.
Regionların sosial-iqtisadi inkişafı Dövlət Proqramına uyğun olaraq rayonun daha 16 kəndində - Mirzəhüseynli, Alpoud, Bığır, Türkmən, Şıxəmir, Kürdşaban, Veysəlli, Qaraman, Müskürlü, Mırtı, Ərəbcəbirli, Qəbələ-Müskürlü, Şıxbəy, Alıkənd, Məlikkənd və Cırqurd kəndlərində modul tipli sutəmizləyici qurğunun quraşdırılması nəzərdə tutulur. Bunun üçün artıq 10 kənddə torpaq sahəsi ayrılmışdır. Bütün işlərin 2013-cü ilədək başa çatdırılması nəzərdə tutulur.
Bölmənin digər xəbərləri
