Güclü yağış Gürcüstanın Kvemo Kartli-Borçalı bölgəsinin Zalqa rayonuna ciddi ziyan vurmuşdur
Tbilisi, 15 avqust (AZƏRTAC). Avqustun 14-dən 15-nə keçən gecə Gürcüstanın şərq bölgəsində dolu ilə müşayiət olunan güclü yağış yağmışdır.
Yağış Tbilisi Beynəlxalq aeroportunda da problem yaratmış, bu hava limanı bəzi reysləri qəbul edə bilməmişdir.
Təbii fəlakətin ən çox Kvemo Kartli-Borçalı bölgəsinin yüksək dağlıq Zalqa rayonuna ziyan vurduğu bildirilir. Rayon icra hakimiyyətindən verilən məlumata görə, dolu və güclü küləklə müşayiət olunan leysan yağışı 6 kəndə ziyan vurmuş, evlərin dam örtüyünü, bir neçə avtomobili zədələmiş, 800 hektardan çox sahədə kənd təsərrüfatı məhsullarını məhv etmişdir. Təbii fəlakət nəticəsində, həmçinin mal-qara və ev quşlarının da tələf olduğu bildirilir.
Bölgənin yaşlı sakinləri təbiətin belə şıltaqlığını xatırlamadıqlarını söyləyirlər.
Baş vermiş təbii fəlakət nəticəsində dəymiş ziyanın miqyasını müəyyənləşdirmək üçün xüsusi komissiya yaradılmışdır.
İslam Əliyev
AZƏRTAC-ın xüsusi müxbiri
Tbilisi
Bölmənin digər xəbərləri
