Güclü yağış Zaqatala rayonunda bir sıra fəsadlar yaratmışdır
Zaqatala, 21 avqust (AZƏRTAC). Avqustun 20-də axşam saatlarından etibarən ölkənin şimal-qərb bölgəsində yerləşən rayonlara leysan yağışlar yağmışdır.
AZƏRTAC xəbər verir ki, leysan yağışlar Zaqatala rayonunda bir sıra fəsadlar yaratmışdır. Təbii fəlakət nəticəsində dağ çaylarında suyun səviyyəsi xeyli artmışdır. Nəticədə rayonun dağətəyi kəndlərində ciddi problemlər yaranmışdır. Sel suları rayonun dağ yamacında yerləşən 10-a yaxın kəndinin həyətyanı sahələrinə, evlərin zirzəmilərinə, həmçinin əhalinin əkin yerlərinə və meyvə bağlarına dolaraq təsərrüfatlara xeyli ziyan vurmuşdur.
Səhərədək davam edən leysan yağışlar rayonun kommunikasiya xətlərini də zədələmişdir. Naqillərin qırılması nəticəsində kəndlərə elektrik enerjisinin verilişi dayandırılmışdır.
Hazırda Zaqatalada yaranmış vəziyyətlə əlaqədar rayon fövqəladə hallar komissiyası və digər aidiyyəti qurumlar tərəfindən qabaqlayıcı tədbirlər həyata keçirilir. Əraziyə rayon suvarma sistemləri və 17 nömrəli Zaqatala yol istismarı idarələrinin texnikaları cəlb edilmişdir.
Təbii fəlakətin nəticələrini qısa müddətdə aradan qaldırmaq üçün invensiv iş aparılır.
Bölmənin digər xəbərləri
