GÜLƏŞ ÜZRƏ DÜNYA KUBOKUNUN QALİBİ FİRDOVSİ UMUDOVUN ÇIXIŞI
-Möhtərəm cənab Prezident,
Hörmətli mərasim iştirakçıları.
Bu gün biz çox əlamətdar və tarixi anlar yaşayırıq. Sizin rayonumuza hər gəlişiniz biz gənclər üçün əsl bayrama çevrilir. Qazax Olimpiya İdman Kompleksinin açılışında iştirakıma və Sizin qarşınızda çıxış etdiyimə görə, böyük qürur hissi keçirirəm.
Bu Olimpiya İdman Kompleksi biz idmançılara Sizin ən dəyərli hədiyyənizdir. Ölkəmizdə idmanın inkişafı, idmanda əldə olunan nailiyyətlər ulu öndərimiz Heydər Əliyevin adı ilə bağlıdır. Ulu öndərimizin əvəzsiz, qayğıkeş münasibəti nəticəsində Azərbaycanda idmanın bütün sahələrində güclü inkişaf başlamışdır və bu gün də davam etməkdədir.
Azərbaycanda idmanın və bədən tərbiyəsinin inkişafına, maddi-texniki bazasının möhkəmləndirilməsinə Sizin tərəfinizdən yüksək qayğı göstərilir. Həyata keçirilən kompleks tədbirlər nəticəsində Azərbaycan idmançıları dünya və Avropa çempionatlarında, müxtəlif beynəlxalq yarışlarda ölkəmizin idman şərəfini layiqincə qoruyaraq, yüksək nəticələr əldə etmiş və Azərbaycan ən mötəbər yarışların keçirildiyi məkana çevrilmişdir. Azərbaycan idmanının qazandığı uğurlarda qazaxlı idmançıların da payı vardır. Onlar müxtəlif beynəlxalq turnirlərdə uğurla çıxış etmiş, Azərbaycanın bayrağını yüksəklərə qaldırmış, Vətənə qələbə ilə qayıtmışlar. Belə möhtəşəm və gözəl kompleksin bizim istifadəmizə verilməsi isə məsuliyyətimizi qat-qat artırır. Əminəm ki, Sizin göstərdiyiniz bu diqqət və qayğı sayəsində idmançılarımız yarışlara daha yaxşı hazırlaşacaq və gələcək Olimpiya oyunlarından, dünya və Avropa çempionatlarından doğma Azərbaycanımıza yüksək mükafatlar və medallarla dönəcəklər.
Sərbəst güləş üzrə Azərbaycan yığma komandasının məşqçisi kimi, üzərimə böyük məsuliyyət götürərək Sizə söz verirəm: Yetişdirdiyim idmançıların zəfər səsləri dünyanın bütün ölkələrindən gələcək və Qarabağ qələbəsi ilə həmahəng səslənəcəkdir. Azərbaycan gənclərinin sağlam və möhkəm olması, dünya idman məkanında həmişə zirvələrə qalxmaq yolunda göstərdiyiniz əvəzolunmaz qayğı buna tam imkan verir.
Əziz Prezidentimiz, bu gün istifadəyə verilən möhtəşəm olimpiya kompleksinin açılışında biz gənclərə göstərdiyiniz bu qayğıya görə Sizə dərin minnətdarlığımızı, səmimi təşəkkürümüzü çatdırırıq. Sizi əmin edirik ki, ulu öndərimiz Heydər Əliyevin “bədən tərbiyəsi və idmanı ümumxalq hərəkatına çevirməliyik” tarixi tapşırığının həyata keçirilməsi və bizim üçün yaradılmış bu gözəl şəraitdən istifadə edərək, Azərbaycan idmanının şöhrətinin gündən-günə artırılması üçün daim, yorulmadan çalışacağıq.
X X X
Prezident İlham Əliyev mərasimdə nitq söylədi.
X X X
Sonra idmançıların nümunəvi çıxışları və incəsənət ustalarının iştirakı ilə konsert oldu.
Bölmənin digər xəbərləri
