Güləşçimiz Murad Məmmədov Avropa çempionatında üçüncü olub
Bakı, 3 aprel, AZƏRTAC
Azərbaycanın yunan-Roma güləşçisi Murad Məmmədov Macarıstanda keçirilən Avropa çempionatında bürünc medal qazanıb.
AZƏRTAC xəbər verir ki, M.Məmmədov (60 kq) ilk görüşdə ispaniyalı Daniel Bobilloya tam üstünlüklə qalib gəlib - 8:0. M.Məmmədov dörddəbir finalda moldovalı Vitali Yeriomenkonu yolundan kənarlaşdırıb - 6:1. Güləşçimiz yarımfinalda türkiyəli Kerem Kamala uduzub - 0:8. Həmyerlimiz bürünc medal uğrunda Razvan Arnaut (Rumıniya) ilə qarşılaşıb. Rəqibini 5:2 hesabı ilə məğlub edən M.Məmmədov qitə birinciliyini üçüncü pillədə başa vurub.
Qeyd edək ki, daha əvvəl yunan-Roma güləşçilərindən Eldəniz Əzizli (55 kq) qızıl, Taleh Məmmədov (63 kq) gümüş, Sənan Süleymanov (77 kq) və İslam Abbasov (87 kq) bürünc medala sahib çıxıblar.
Sərbəst güləşçilərdən Məhəmmədxan Məhəmmədov (97 kq) qızıl, Əliabbas Rzazadə (57 kq), Hacı Əliyev (65 kq), Əşrəf Aşırov (79 kq), Abubakr Abakarov (86 kq) gümüş, Turan Bayramov (74 kq) və Osman Nurməhəmmədov (92 kq) bürünc medal qazanıb. Yığma ümumi komanda hesabında birinci yeri tutaraq, Avropa çempionu olub. Qadın güləşçilərdən isə Elis Manolova (65 kq) gümüş medala yiyələnib.
Bölmənin digər xəbərləri
