İQTİSADİYYAT
“GÜNƏŞLİ” YATAĞINDA YÜKSƏKHASİLATLI QUYU İSTİFADƏYƏ VERİLMİŞDİR
ARDNŞ-dən bildirmişlər ki, “Günəşli” yatağındakı, 19 nömrəli platformada növbəti yüksəkhasilatlı quyu istifadəyə verilmişdir. Bu quyu vasitəsi ilə 3037 metr dərinlikdən gündə 200 ton neft və 30 min kubmetr qaz çıxarılır. Ehtiyatda daha 3-4 məhsuldar lay vardır. Yeni quyu 2 ay 23 günə qazılmışdır.
Səkkiz istismar quyusu qazmaq üçün nəzərdə tutulan 19 nömrəli platforma yatağın cənub hissəsində quraşdırılmışdır. İki il yarım bundan əvvəl istifadəyə verilən bu platformadan artıq beş quyu qazılmışdır. İndi 6-cı quyunun qazılmasına başlanmışdır. Onu ilin sonunadək təhvil vermək planlaşdırılır.
ARDNŞ-in məlumatına görə, “Günəşli” yatağının platformalarında ötən 8 ayda bu yataqdan 3,8713 milyon ton neft çıxarılmışdır. Bunun 6470 tonu plandan əlavə hasil edilmişdir.
Tədqiqatlara görə, “Günəşli”nin neft ehtiyatları təxminən 60 milyon ton, qaz ehtiyatları isə 16,3 milyard kubmetrdən artıqdır.