Gürcü politoloq: Azərbaycan xalqı İlham Əliyevin rəhbərliyi ilə hələ çox qələbələr qazanacaq
Tbilisi, 23 dekabr, AZƏRTAC
Azərbaycanın hərbi qələbəsi və 1990-cı illərin əvvəlində Ermənistan tərəfindən işğal edilmiş torpaqlarının qaytarılması ilə əlaqədar hazırda Azərbaycan Prezidenti İlham Əliyevin adı bütün dünyada dillər əzbəridir. Lakin biz - Azərbaycanın qonşuları və dostları İlham Əliyevin ölkə rəhbəri, habelə Azərbaycan Ordusunun Ali Baş Komandanı vəzifəsində fəaliyyətini çoxdan izləyirik.
Gürcü politoloq Tengiz Txilava bu fikirləri AZƏRTAC-a müsahibəsində söyləyib.
O deyib: “Heç kəs üçün sirr deyil ki, Birinci Qarabağ müharibəsində Ermənistanın qələbəsi Ermənistan tərəfindən hərtərəfli düşünülmüş hərbi kampaniyanın və ya onun üstünlüyünün nəticəsi deyil, bəzi başqa halların nəticəsi olub. Heydər Əliyev atəşkəs barədə saziş bağlayarkən yaxşı bilirdi ki, bu güzəştlər müvəqqətidir və Azərbaycan öz torpaqlarını geri qaytaracaq. Lakin bundan ötrü çox böyük iş aparmaq lazım idi. Əsas vəzifələrdən biri dünya siyasi sistemində Azərbaycanın yerinin müəyyən edilməsi idi. Azərbaycan hələ “Əsrin müqaviləsi” üzərində işləyərkən və onun icrası zamanı hər hansı göstərişlərə və ya şirnikləndirmələrə məhəl qoymayan, müstəqil siyasət yürüdən müstəqil dövlət olduğunu göstərdi”.
İlham Əliyev Azərbaycan Prezidenti vəzifəsinə seçiləndən sonra gürcü politoloqa verdiyi müsahibədə bu vəzifənin yüksək məsuliyyət olduğunu qeyd edirdi. Politoloq deyib: “Bugünkü qalib ölkənin təməli məhz həmin dövrdə qoyulurdu. Cənab İlham Əliyevin rəhbərliyi ilə həqiqətən nəhəng işlər görülüb”.
Bu illər ərzində Azərbaycan Ordusunda islahat aparılıb, ordu gücləndirilib. O, ən müasir silahlarla təchiz edilib və yüksək texnologiyalara əsaslanan müharibəni zəfərlə başa vurub. Azərbaycan Ordusunun uğurları artıq dünyanın bir sıra ölkələrində diqqətlə öyrənilən bir mövzuya çevrilib. Əlbəttə, müharibə qurbansız olmur və həlak olmuş hər bir əsgərin həyatı əzizdir. Bununla belə, hərbi əməliyyat elə planlaşdırılmışdı ki, döyüşçülərin həyatı maksimal dərəcədə qorunsun.
T.Txilava vurğulayıb: “Lakin ölkənin siyasi və iqtisadi inkişafı olmasaydı, bu qələbə mümkün olmazdı. Azərbaycan iqtisadiyyatı inkişaf sürətinə görə yüksək dərəcədə inkişaf etmiş çox ölkələr səviyyəsindədir. Bütün uğurların təməli məhz iqtisadiyyat olub. Azərbaycan Prezidenti dünyada Qarabağ məsələsinə münasibəti dəyişdirməli olan çoxillik diplomatik işə şəxsən özü rəhbərlik edirdi. Deyə bilərik ki, bu hədəf bütövlükdə əldə edilib və ayrı-ayrı ölkələrin bəzi atmacaları elə atmaca olaraq qalıb, hərçənd Azərbaycan Prezidenti bu atmacaların layiqli cavabını verib. Ən başlıcası, bu iş nəticəsində Qarabağ məsələsinin nizamlanmasında bizim regionun iki iri siyasi aktorunun - Rusiya və Türkiyənin razılaşdırılmış iştirakı təmin edilib. Cəsarətlə demək olar ki, məhz Azərbaycanın və onun Prezidentinin yürütdüyü müstəqil siyasət sayəsində bizim regionda siyasi vəziyyət kəskin şəkildə dəyişib. İlham Əliyevin irəli sürdüyü son təşəbbüslərin əhəmiyyəti isə region çərçivəsi ilə məhdudlaşmır”.
Gürcü politoloq sonda deyib: “Bəzən qələbə arxayınlaşmaya gətirib çıxara bilər. Lakin işğaldan azad edilmiş ərazilərlə bağlı layihələr, həmçinin Prezident İlham Əliyevin istər ölkədə, istərsə də beynəlxalq arenada atdığı addımlar göstərir ki, Azərbaycan əsla arxayınlaşmayıb və işgüzar əhvaldadır. Mən əminəm ki, Azərbaycan və onun xalqı İlham Əliyevin rəhbərliyi ilə çox qələbələr qazanacaq”.
Xətai Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
