Gürcüstan parlamentinin sədri Nino Burcanadze yanvarın 28-də Azərbaycana ikigünlük rəsmi səfərə gəlmişdir.

Iki ölkənin dövlət bayraqları ilə bəzədilmiş Bakı dəmir yol vağzalında xanım Nino Burcanadzeni və onu müşayiət edən şəxsləri Milli Məclisin sədri Murtuz Ələsgərov, parlament sədrinin müavini Ziyafət Əsgərov, Azərbaycanın Tbilisidəki səfiri Hacan Hacıyev, Gürcüstanın Bakıdakı səfiri Zurab Qumberidze, digər rəsmi şəxslər qarşıladılar.

Gürcüstan parlamentinin sədri jurnalistlərin suallarına cavab verərək bildirdi ki, ölkələrimiz arasında ən mehriban dostluq münasibətləri yaranmışdır. Səfər zamanı keçiriləcək görüşlərdə Azərbaycan-Gürcüstan münasibətlərinin indiki vəziyyəti və perspektivləri, parlamentlərarası əlaqələrin daha da inkişaf etdirilməsi və digər məsələlər müzakirə olunacaqdır.

X X X

ŞƏHİDLƏR XİYABANINI ZİYARƏT

Elə həmin gün Gürcüstan parlamentinin sədri xanım Nino Burcanadze və onu müşayiət edən şəxslər Şəhidlər xiyabanını ziyarət edərək, Azərbaycanın azadlığı, suverenliyi və ərazi bütövlüyü uğrunda canlarından keçmiş cəsur oğul və qızlarımızın xatirəsini ehtiramla andılar.

Gürcüstan parlamentinin başçısı şəhidlərin xatirəsinə hörmət əlaməti olaraq, “Əbədi məşəl” abidəsinin önünə əklil qoydu.

Sonra xanım Burcanadze Şəhidlər xiyabanının fəxri qonaqlar kitabına ürək sözlərini yazdı.

Milli Məclis sədrinin müavini Ziyafət Əsgərov, Gürcüstanın Bakıdakı səfiri Zurab Qumberidze, Azərbaycanın Tbilisidəki səfiri Hacan Hacıyev də qonaqlarla birlikdə Şəhidlər xiyabanında olmuşlar.

X X X

XARİCİ İŞLƏR NAZİRLİYİNDƏ GÖRÜŞ

Yanvarın 28-də Azərbaycan Respublikasının xarici işlər naziri Vilayət Quliyev Gürcüstan parlamentinin sədri xanım Nino Burcanadzenin başçılıq etdiyi nümayəndə heyətini qəbul etmişdir.

Qonaqları səmimi salamlayan nazir Vilayət Quliyev bu səfərin ölkələrimiz arasındakı dostluq münasibətlərinin möhkəmlənməsi və əlaqələrin genişlənməsi üçün faydalı olacağına inam yaratdığını bildirmişdir.

Gürcüstan parlamentinin sədri Nino Burcanadze ölkələrimiz arasındakı münasibətləri yüksək qiymətləndirərək, əlaqələrin bir çox sahələrdə genişlənməsinin, o cümlədən parlamentlərarası əlaqələrin inkişafının, beynəlxalq təşkilatlarda daha sıx əməkdaşlığın davam etdirilməsinin zəruriliyini vurğulamışdır.

Görüş zamanı tərəflər Qara Dəniz İqtisadi Əməkdaşlıq Təşkilatı Parlament Assambleyası və GUÖAM çərçivəsində terrorizmə qarşı birgə mübarizə aparılmasının vacibliyini xüsusi olaraq qeyd etmişlər.

Daha sonra xarici siyasət idarəsinin başçısı Vilayət Quliyev Ermənistan-Azərbaycan, Dağlıq Qarabağ münaqişəsi nəticəsində öz doğma yurd-yuvalarından didərgin düşmüş insanların ağır vəziyyəti və məsələnin sülh yolu ilə həlli istiqamətində görülən işlər barədə qonağa ətraflı məlumat vermişdir.

Görüşdə qarşılıqlı maraq doğuran bir sıra məsələlər də müzakirə olunmuşdur.

X x x

                     PARLAMENTLƏRARASI ƏLAQƏLƏR ÜZRƏ İŞÇİ QRUPUNUN ÜZVLƏRİ İLƏ GÖRÜŞ

Ölkəmizdə rəsmi səfərdə olan Gürcüstan parlamentinin sədri xanım Nino Burcanadze elə həmin gün Milli Məclisin parlamentlərarası əlaqələr üzrə işçi qrupunun üzvləri ilə görüşmüşdür.

Gürcüstan parlamenti ilə dostluq qrupunun rəhbəri Zahid Qaralov görüşü açaraq ölkələrimizin parlament üzvləri arasında münasibətlərin inkişafı sahəsində son illər görülən işlər barədə məlumat verdi. Zahid Qaralov özünün başçılıq etdiyi regional məsələlər daimi komissiyasının fəaliyyətindən də danışdı.

Gürcüstan parlamentinin başçısı Nino Burcanadze qanun yaradıcılığı sahəsində əməkdaşlığı möhkəmləndirmək üçün Gürcüstan və Azərbaycanın qanunvericilik orqanlarında fəaliyyət göstərən parlamentlərarası əlaqələr üzrər işci komissiyalarının fəaliyyətini gücləndirməyin vacibliyini vurğuladı. Gürcüstan və Azərbaycan parlamentlərinin deputatları uğurla əməkdaşlıq edir və mühüm məsələlərə dair fikir mübadiləsi aparırlar. Nino Burcanadze dedi: “Ölkələrimizin parlamentləri arasında elə etimad yaranmışdır ki, bəzən biz sənədləri imzalayarkən onları oxumaya da bilərik”.

Xanım N.Burcanadze yeni demokratik cəmiyyətin hüquqi bazasının yaradılması ilə bağlı Gürcüstan parlamentinin fəaliyyəti barədə ətraflı danışaraq bildirdi ki, qanunvericilik orqanının üzvləri Bakı-Tbilisi-Ərzurum qaz kəmərinə dair sazişi bu yaxınlarda ratifikasiya etmişlər.

Gürcüstan Parlamentinin sədri Abxaziya və Dağlıq Qarabağ münaqişələrinin nizama salınması məsələlərinə də toxunaraq dedi ki, bunların tezliklə həll edilməsi Cənubi Qafqazda möhkəm sülhü və təhlükəsizliyi təmin etməyə imkan verərdi.

Görüşdə Milli Məclis sədrinin müavini Ziyafət Əskərov, Gürcüstanın Bakıdakı səfiri Zurab Qumberidze, Azərbaycanın Tbilisidəki səfiri Hacan Hacıyev iştirak edirdi.

X X X

                                                             MİLLİ MƏCLİSDƏ QƏBUL

Sonra Gürcüstan Parlamentinin sədri xanım Nino Burcanadzeni Milli Məclisin sədri Murtuz Ələsgərov qəbul etdi.

Murtuz Ələsgərov hörmətli qonağı səmimiyyətlə salamlayaraq dedi ki, Gürcüstan parlamenti nümayəndələrinin Bakıya hər bir səfəri ölkələrimizin qanunvericilik orqanları arasında əlaqələrin möhkəmlənməsinə xidmət edir. Azərbaycan və Gürcüstan dövlət müstəqilliyi əldə etdikdən sonra münasibətlərimiz daha intensiv inkişaf edir. Dövlət başçılarının görüşləri bu münasibətlərin inkişafında böyük rol oynayır. Əlamətdar haldır ki, Heydər Əliyev Azərbaycan Prezidenti vəzifəsinin icrasına yenicə başladığı zaman Gürcüstan Prezidenti Eduard Şevardnadze ölkəmizə səfər etmiş ilk dövlət xadimi olmuşdur. Sonralar ölkələrimizin münasibətlərinin inkişafına yeni təkan verən görüşlər oldu. Azərbaycan Prezidenti Heydər Əliyev 1996-ci ildə Gürcüstana rəsmi səfər etdi. Səfər zamanı 10-dan çox sənəd imzalandı, onların sırasında Gürcüstan və Azərbaycan arasında dostluq, əməkdaşlıq və qarşılıqlı anlaşma haqqında müqavilə, Qafqaz regionunda təhlükəsizlik və sabitlik haqqında birgə bəyanat kimi vacib sənədlər də vardı. Ökələrimiz arasındakı münasibətlərin möhkəm təməlini qoymuş həmin bəyannaməni Heydər Əliyev “Tbilisi bəyannaməsi” adlandırmışdır. Bir il sonra Gürcüstan Prezidenti Eduard Şevardnadzenin Bakıya səfəri zamanı da mühüm danışıqlar aparıldı, neft-qaz sənayesi sahəsində əməkdaşlıq haqqında müqavilə və bir sıra digər sazişlər imzalandı.

Murtuz Ələsgərov Gürcüstan və Azərbaycan münasibətlərinin inkişafında parlament nümayəndələrinin roluna toxunaraq, Gürcüstan parlamentinin keçmiş sədri Zurab Jvaniya ilə keçirdiyi görüşlər üzərində ətraflı dayandı və dedi ki, onların ilk görüşü zamanı parlament əlaqələrinin təşkili haqqında birgə rəsmi məlumat imzalanmışdı.

Xanım Nino Burcanadze səmimi qəbula və qonaqpərvərliyə görə təşəkkürünü bildirərək, Gürcüstan-Azərbaycan münasibətlərinin bütün Cənubi Qafqaz xalqlarının əməkdaşlığına nümunə olduğunu məmnunluqla qeyd etdi. Sonra Gürcüstan parlamentinin başçısı qanun yaradıcılığı sahəsində, habelə Avropa Şurasında və digər beynəlxalq təşkilatlarda mühüm problemlərin müzakirəsində ölkələrimizin parlamnetlərinin əməkdaşlığı məsələləri üzərində ətraflı dayandı.

Nino Burcanadze Cənubi Qafqazda regional münaqişələrin tezliklə nizama salınması zərurətindən danışaraq vurğuladı ki, bu regionda sabitliyin bərqərar olması abxaz və Dağlıq Qarabağ münaqişələrinin həllindən çox asılıdır. Qafqaz yalnız bundan sonra inkişaf və tərəqqi edən regiona çevrilə bilər.

Tərəflər Gürcüstan-Azərbaycan parlamentlərarası münasibətlərinin inkişaf perspektivlərinə dair bir sıra məsələləri də müzakirə etdilər.

Qəbulda Milli Məclis sədrinin birinci müavini Arif Rəhimzadə, parlament sədrinin müavini Ziyafət Əsgərov, Gürcüstanın Bakıdakı səfiri Zurab Qumberidze, Azərbaycanın Tbilisidəki səfiri Hacan Hacıyev, Milli Məclisin daimi komissiyalarının sədrləri iştirak edirdilər.

X X X

GÜRCÜSTAN VƏ AZƏRBAYCAN PARLAMENTLƏRİ SƏDRLƏRİNİN MƏTBUAT KONFRANSI

Parlamentlərin sədrləri görüşdən sonra mətubat konfransı keçirdilər.

Milli Məclisin sədri Murtuz Ələsgərov öz çıxışında vurğuladı ki, Gürcüstan parlamentinin başçısı Milli Məclis sədrinin dəvəti ilə Bakıya rəsmi səfərə gəlmişdir. O, xanım Burcanadzenin keçirdiyi görüşlərin və apardığı danışıqların yekunlarını yüksək qiymətləndirdi. Murtuz Ələsgərov jurnalistlərə bildirdi ki, Gürcüstan parlamentinin sədri səfərin ikinci günü Azərbaycanın baş naziri ilə görüşəcək, sonra isə onu Azərbaycan Prezidenti Heydər Əliyev qəbul edəcəkdir. Görüşlər başa çatdıqdan sonra biz birgə bəyanat imzalamaq barədə razılığa gəlmişik.

Gürcüstan parlamentinin sədri xanım Nino Burcanadze bildirdi ki, hazırda Gürcüstanla Azərbaycan arasında münasibətlərdə heç bir fikir ayrılığı yoxdur. Ölkələrimizin dostluq münasibətlərinin daha da yaxşılaşdırılması onun indiki səfəri çərçivəsində aparılacaq müzakirələrin əsas mövzusu olacaqdır. Gürcüstan və Azərbaycan xalqlarının yaxınlaşmasında mühüm rol oynayan parlamentlərarası əlaqələrin möhkəmələndirilməsinə də böyük diqqət yetiriləcəkdir.

Sonra Murtuz Ələsgərov və Nino Burcanadze Gürcüstan və Azərbaycan jurnalistlərinin suallarına cavab verdilər.

X X X

Həmin gün axşam Milli Məclisin sədri Murtuz Ələsgərovun adından Gürcüstan parlamentinin sədri xanım Nino Burcanadzenin şərəfinə rəsmi şam yeməyi verildi.