Gürcüstan-Rusiya danışıqlarının 67-ci raundu da nəticəsiz olub
Tbilisi, 2 iyul, AZƏRTAC
Gürcüstan ilə Rusiya arasında normallaşma prosesinə dair Cenevrə Beynəlxalq Danışıqlarının 67-ci raundu da nəticəsiz başa çatıb.
AZƏRTAC xəbər verir ki, Gürcüstan Xarici İşlər Nazirliyi bununla bağlı bəyanat yayıb.
Bildirilir ki, danışıqlar çərçivəsində Gürcüstan nümayəndə heyəti Rusiya ilə Sxinvalidəki işğalçı rejim arasında 2026-cı ilin mayın 9-da imzalanmış müttəfiqlik əməkdaşlığının dərinləşdirilməsi haqqında qondarma saziş və onun tələsik icrası ilə bağlı dərin narahatlığını ifadə edib. Qeyd olunub ki, bu cür qondarma sazişlər hüquqi cəhətdən etibarsızdır, beynəlxalq hüquq normalarını kobud şəkildə pozur və konstruktiv dialoqa mane olur.
Gürcüstan nümayəndə heyəti Cenevrə beynəlxalq danışıqlarının gündəliyindəki əsas məsələlərə, məsələn, Rusiyanın Avropa İttifaqının vasitəçiliyi ilə əldə edilmiş 12 avqust 2008-ci il tarixli atəşkəs sazişi çərçivəsində beynəlxalq öhdəliklərini tam şəkildə yerinə yetirməsinin zəruriliyinə və işğal olunmuş ərazilərdən məcburi köçkünlərin və qaçqınların təhlükəsiz və ləyaqətli şəkildə öz evlərinə qayıtmalarına diqqət yetirib.
Gürcüstan tərəfi işğal olunmuş bölgələrdə çətin təhlükəsizlik, humanitar və insan haqları vəziyyəti ilə bağlı məsələləri qaldırıb.
Rusiya və işğalçı rejimlərinin nümayəndələri gündəlikdəki əsas məsələlərdən biri olan işğal olunmuş ərazilərdən məcburi köçkünlərin və qaçqınların öz evlərinə qayıtması ilə bağlı məsələnin müzakirəsi zamanı danışıqlar prosesini tərk ediblər.
Gürcüstan nümayəndə heyətinə xarici işlər nazirinin müavini Laşa Darsalia rəhbərlik edib.
Cenevrə Beynəlxalq Danışıqlarının növbəti, 68-ci raundu noyabrda keçiriləcək.
Bölmənin digər xəbərləri
