Gürcüstanda koronavirusun yeni növü aşkarlanıb
Tbilisi, 4 yanvar, AZƏRTAC
Böyük Britaniyada sürətlə yayılan yeni növ koronavirus Gürcüstanda da aşkar olunub.
AZƏRTAC xəbər verir ki, bu barədə Gürcüstan Səhiyyə Nazirliyinin Xəstəliklərə Nəzarət Milli Mərkəzinin sədrinin müavini Paata İmnadze bu gün keçirdiyi brifinqdə məlumat verib.
P.İmnadze deyib: “Koronavirusun yeni növü ilə bağlı üç nəfər test olunub və onlardan birində, 50 yaşlı kişidə test müsbət nəticələnib. Hazırda virusa yoluxan şəxs klinikada nəzarət altındadır. Onun təmasda olduğu insanlar araşdırılır”.
Paata İmnadzenin sözlərinə görə, yeni növ virus mövcud virusdan daha sürətli ötürmə qabiliyyətinə malikdir.
O, bu səbəbdən də təhlükəsizlik tədbirlərinin gücləndirilməsinin və qorunmanın vacib olduğunu bildirib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
