Gürcüstanda yaşıl enerji layihəsi əsasında külək elektrik stansiyası inşa olunacaq
Tbilisi, 11 yanvar, AZƏRTAC
Gürcüstan hökuməti Buxarestdə “Azərbaycan Respublikası, Gürcüstan, Rumıniya və Macarıstan Hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında Saziş”in imzalanmasından sonra ölkədə elektrik enerjisi istehsalına diqqəti artırıb.
AZƏRTAC xəbər verir ki, Gürcüstan hökumətinin iclasında “İmereti” Külək Elektrik Stansiyasının (KES) tikintisi məsələsi müzakirə olunub.
İclasda “İmereti” KES-in tikintisi ilə bağlı Gürcüstan hökuməti ilə “Achar Energy-2007” MMC arasında imzalanacaq müqavilənin layihəsi nəzərdən keçirilib.
Layihədə, KES-in tikintisinin dövlət ilə özəl sektorun birgə həyata keçirməsi nəzərdə tutulub.
“İmereti” KES-in tikintisində dövlət və özəl sektorun birgə iştirakı üçün qanunvericiliyin təkmilləşdirilməsi və layihənin texniki-iqtisadi parametrlərinin əsaslandırılması ilə bağlı layihənin hazırlanması barədə qərar qəbul edilib.
“İmereti” KES-in gücü 50 MVt, istehsal gücü - 180,89 milyon kilovat-saat, investisiya tutumu isə 66 milyon ABŞ dolları nəzərdə tutulub.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
