GÜRCÜSTANIN İNDİKİ PARLAMENTİ GƏLƏCƏK PARLAMENT ÜÇÜN REQLAMENT HAZIRLAYIR

14.02.2004 [08:14]
Çap et
A⁺ A^-

AZƏRTAC-ın müxbiri Tbilisidən xəbər verir ki, Gürcüstan parlamentinə martın 28-də keçiriləcək proporsional seçkilərdən sonra yeni parlament fəaliyyətə başlayacaqdır. Hazırkı parlament isə yeni parlament üçün reqlament hazırlayır. Gələcək parlamentdə indikindən fərqli olaraq, 15 komitə deyil, 11 komitə, 4 vitse-spiker əvəzinə 3 vitse-spiker seçiləcəyi planlaşdırılır. Yeni yaradılacaq komitələr arasında Avropaya inteqrasiya komitəsinin də olacağı diqqət çəkir.

Gələcək parlament üçün reqlamentdə səsvermədə iştirak etmədiyinə və yaxud səsvermə kartını başqasına verdiyinə görə deputatın cərimələnməsi nəzərdə tutulur. Xəbərdarlığa məhəl qoymayıb səsvermə kartını başqasına verən deputat bir aylıq maaşdan məhrum edilir. Eyni hal təkrar olunarsa, deputat üç aylıq maaşı həcmində cərimələnəcəkdir. Bu, üçüncü dəfə təkrar olunduqda isə reqlament deputatın altı aylıq maaşından məhrum edilməsini nəzərdə tutur. Həmçinin parlament üzvü iş gününün başlanğıcında və sonunda qeydiyyatdan keçməlidir.

Reqlament layihəsində digər yenilik ondan ibarətdir ki, parlament üzvü hər il tibbi və narkotik müayinədən keçməlidir.