İQTİSADİYYAT
Gürcüstanla Azərbaycanın planlaşdırdığı yeni enerji layihəsi regionun inkişafı üçün əhəmiyyət kəsb edir
Tbilisi, 5 mart, AZƏRTAC
Gürcüstan ilə Azərbaycanın Qara dəniz regionunda həyata keçirməyi planlaşdırdığı yeni enerji layihəsi ölkələrimizin Avropa enerji bazarına inteqrasiyasını sürətləndirə bilər.
AZƏRTAC xəbər verir ki, bu sözləri jurnalistlərə müsahibəsində Gürcüstanın İqtisadiyyat və Davamlı İnkişaf nazirinin birinci müavini Yekaterine Mikabadze deyib.
Onun sözlərinə görə, Gürcüstanın İqtisadiyyat və Davamlı İnkişaf naziri Natia Turnavanın Azərbaycana səfəri zamanı qeyd etdiyi bu layihə bütün region üçün çox önəmlidir.
“Bu layihə, eyni zamanda, Azərbaycanın və Gürcüstanın Avropa ilə əlaqələrinin artırılması və iqtisadiyyatlarımızın qlobal iqtisadiyyata inteqrasiyası baxımından da vacib rol oynaya bilər. Bu, hər iki ölkənin vətəndaşları üçün mənfəətli ola bilər. Layihə hazırda inkişaf mərhələsindədir və indiki halda sadəcə plan şəklini daşıyır”, - deyə nazir müavini qeyd edib.
Qeyd edək ki, Cənub Qaz Dəhlizi Məşvərət Şurası çərçivəsində nazirlərin Bakıda keçirilən VI toplantısı çərçivəsində Gürcüstanın İqtisadiyyat və Davamlı İnkişaf naziri Natia Turnava azərbaycanlı həmkarı Mikayıl Cabbarovla görüşü zamanı Qara dənizin dibi ilə elektrik enerjisi xəttinin çəkilməsini təklif edib.
Xətayi Əzizov
AZƏRTAC-ın xüsusi müxbiri
Tbilisi