Gürgən-Pirallahı marafonu böyük maraqla qarşılanıb
Marafonda 400-ə yaxın insan iştirak edib
Bakı, 27 oktyabr, AZƏRTAC
Yeni Azərbaycan Partiyasının yaranmasının 25 illik yubileyi münasibətilə Pirallahı rayonunda marafon yarışı keçirilib. YAP Pirallahı rayon təşkilatının təşəbbüsü ilə keçirilən marafona 400-ə yaxın fəal gənc və rayon sakini qatılıb.
AZƏRTAC xəbər verir ki, tədbirdə YAP Pirallahı rayon təşkilatının sədri, RİH-in şöbə müdiri Hikmət Şikarov Azərbaycanda dövlətçiliyin qorunmasında, ölkəmizin tərəqqisində YAP-ın oynadığı mühüm roldan danışıb.
Ölkəmizdə idmanın inkişafına göstərilən dövlət qayğısından danışan H.Şikarov Azərbaycan idmançılarının Olimpiya, Avropa və Dünya çempionatlarındakı parlaq qələbələrindən söhbət açıb. O qeyd edib ki, Azərbaycan Prezidenti İlham Əliyevin tapşırığına əsasən ölkəmizdə idmanın kütləviliyinin artırılması, uşaq, yeniyetmə və gənclərin fiziki sağlamlıqlarının möhkəmləndirilməsi prioritet istiqamətlərdən biridir. O deyib: “Pirallahı rayonunda gənclər siyasəti və idmanın inkişafı istiqamətində mütəmadi olaraq işlər aparılır. Bu işlər gənclərin vətənpərvərlik tərbiyəsinin gücləndirilməsi, gənclərə sağlam həyat tərzinin aşılanması, gənclərin problemlərinin həllinə dəstək, istedadlı gənclərin aşkar olunmasına şərait yaradır. Müxtəlif yarışlar və turnirlər keçirməklə rayonda həm idmanın inkişafı həm də kütləviliyinin artırılması sahəsində tədbirlər həyata keçirilir”.
Daha sonra marafona start verilib.
İştirakçılar Gürgən qəsəbəsinin “Qala divarları kompleksin”dən hərəkət edərək Pirallahı qəsəbəsində ulu öndər Heydər Əliyevin postamentinə qədər məsafəni qət ediblər. Marafonun uzunluğu ümumilikdə 10 kilometr olub.
Sonda qaliblərə Yeni Azərbaycan Partiyası Pirallahı rayon təşkilatı tərəfindən qiymətli hədiyyələr və fəxri fərmanlar təqdim olunub.
Bölmənin digər xəbərləri
