Həmrəylik Günü İğdırda azərbaycansevərləri bir araya gətirib
Ankara, 30 dekabr, AZƏRTAC
Türkiyənin İğdır şəhərində fəaliyyət göstərən İğdır-Azərbaycan Evində 31 Dekabr - Dünya Azərbaycanlılarının Həmrəyliyi Günü münasibətilə bayram tədbiri keçirilib.
Azərbaycan Evindən AZƏRTAC-a verilən məlumata görə, yerli ictimaiyyətin, eləcə də gənclərin iştirakı ilə keçirilən tədbir Azərbaycana həmrəylik şüarları ilə başlanıb.
İğdır-Azərbaycan Dil, Tarix və Mədəniyyət Birliyini Yaşatma və Dəstəkləmə Dərnəyinin, eləcə də İğdır-Azərbaycan Evinin sədri, tədqiqatçı-yazıçı Ziya Zakir Acar çıxışında diqqətə çatdırıb ki, dünya azərbaycanlıları ilə həmrəylik Azərbaycanın xarici siyasətində mühüm istiqamətdir.
Keçmiş sovetlər birliyinin antitürk siyasətinin amansızlıqlarından danışan tədqiqatçı Ziya Acarın sözlərinə görə, Azərbaycan və Türkiyəni bir-birindən uzaqlaşdırmaq üçün mümkün bütün vasitələrdən istifadə olunub. Lakin Azərbaycan xalqı heç bir məhdudiyyət və təhlükələrə məhəl qoymadan Araz çayı üstündəki tikanlı məftilləri mətanətlə dağıdaraq haqq səsini bütün dünyaya yayıb.
Azərbaycan xalqının Ümummilli Lideri Heydər Əliyevin qətiyyəti və siyasi uzaqgörənliyi ilə dekabrın 31-nin Dünya Azərbaycanlılarının Həmrəyliyi Günü elan edildiyini diqqətə çatdıran Ziya Zakir Acar vurğulayıb ki, əslində bu bayram təkcə Azərbaycan xalqının deyil, bütün türk dünyasının birlik və həmrəylik günüdür.
Sonra professorlar Elman Xəzər və Kazım Çətin mövzu ətrafında fikir və mülahizələrini bölüşüblər.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
