Azərbaycanın yığma qadın həndbol komandası 2004-cü il Avropa çempionatının seçmə turnirinin keçid mərhələsi görüşlərində iştirak etmək hüququ qazanmışdır. Təsnifat yarışlarında həndbolçularımız İsveçrə (35:33) və Yunanıstan (30:28) komandalarına qalib gəlmiş, qrup turnirində meydança sahiblərinə - bolqarlara 24:25 hesabı ilə uduzmuşlar. Nəticədə, komandamız ikinci yeri tutmuş və keçid mərhələsinə çıxmışdır. Birinci yeri tutan Bolqarıstan və üçüncü yerə çıxan İsveçrə komandaları da növbəti mərhələyə vəsiqə qazanmışlar.

Gənclər, İdman və Turizm Nazirliyinin mətbuat xidmətindən AZƏRTAC-a bildirmişlər ki, komandamızın oyunçusu Nino Sivtsivadze seçmə turnirinin bombardmançısı kimi turnirin xüsusi mükafatına layiq görülmüşdür. Nino üç oyunda 35 qol vurmuşdur.

Keçid turnirində 22 yığma komanda iştirak edəcəkdir. Reytinqə əsasən, püşk atılanadək komandalar iki qrupa bölünəcək və onların hərəsi 11 komanda olacaqdır. Oyunlar mayın 29-30-da və iyunun 5-6-da keçiriləcəkdir. Beş komanda birincilikdə iştirak etmək hüququna artıq nail olmuşdur. Bunlar Danimarka, çempionatın təşkilatçısı Macarıstan, habelə Norveç, Fransa və Rusiya kollektivləridir.

Birincilik gələn il dekabrın 9-19-da keçiriləcəkdir.