Hərbi əməliyyatlar Ermənistanın həm siyasi, həm də iqtisadi iflası ilə nəticələnəcək
Bakı, 3 oktyabr, Səadət Hakıyeva, AZƏRTAC
Ermənistan Qarabağda döyüşmək üçün Suriya, Livan və digər ölkələrdən muzdlular gətirməklə dünyaya özünü “güclü ölkə” kimi təqdim etməyə çalışır. Lakin işğalçı ölkənin mövcud potensialı istər daxili auditoriyaya, istərsə də dünya ictimaiyyətinə yaxşı bəllidir. Muzdlu döyüşçülərdən istifadə etməsinə baxmayaraq, hərbi əməliyyatlar bu ölkəyə baha başa gələcək. Hərbi əməliyyatların ilk 4 günü ərzində aparılan hesablamalara görə, Ermənistana 1 milyard 200 milyon dəyərində zərər dəyib. Bu da işğalçı ölkənin Azərbaycanla resurs müharibəsi aparmaq gücündə olmadığını göstərir.
Bu fikirləri AZƏRTAC-a açıqlamasında Milli Məclisin deputatı Könül Nurullayeva bildirib.
Deputat diqqətə çatdırıb ki, 2 milyon əhalisi olan Ermənistanda yoxsul əhali 23,3 faiz təşkil edir. Yəni bu ölkədə hər 4 nəfərdən 1-i yoxsuldur. Hərbi əməliyyatların vurduğu zərəri aradan qaldırmaq üçün isə təbii ki, külli miqdarda maliyyə vəsaiti tələb olunur. İqtisadçılar da deyirlər ki, bu maliyyə vəsaitini əldə etmək üçün, ilk növbədə, investisiya yatırımı olmalıdır. Ermənistan isə heç vaxt investorlar üçün cəlbedici olmayıb. Üstəlik, işğal siyasəti ucbatından bütün regional və qlobal nəqliyyat-enerji layihələrindən kənarda qalıb.
K.Nurullayevanın sözlərinə görə, iqtisadi təhlillər göstərir ki, hərbi əməliyyatların başladığı 5-6 gün ərzində artıq Ermənistan ərzaq böhranı ilə üz-üzə qalıb. Hərbi əməliyyatların nə zaman yekunlaşacağını isə proqnozlaşdırmaq indiki məqamda mümkün deyil. Bu isə onu deməyə əsas verir ki, hərbi əməliyyatlar Ermənistanın həm siyasi, həm də iqtisadi nöqteyi-nəzərdən iflası ilə nəticələnəcək.
Deputat qeyd edib ki, Ermənistan üçün yeganə çıxış yolu var. Prezident İlham Əliyevin müalicə olunan yaralı hərbçilərlə görüşdə də söylədiyi kimi, erməni xalqı Azərbaycanla sülh şəraitində yaşamaq istəyirsə, öz hakimiyyətini məsuliyyətə cəlb etməli, uzun illər ona rəhbərlik edən quldur kriminal rejimdən birdəfəlik xilas olmalıdır.
Könül Nurullayeva beynəlxalq təşkilatların və bəzi ölkələrin münasibətindən də danışıb: “Bəzi beynəlxalq təşkilatlar uzun müddət susduqları halda, indi fəallaşıblar. Ermənistan silahlı qüvvələri Azərbaycan torpaqlarını işğal edəndə və burada məskunlaşma siyasəti aparanda bu beynəlxalq təşkilatlar harada idi?! Erməni cəlladları Xocalıda qoca, cavan, uşaq demədən əhalini amansızcasına qətlə yetirəndə beynəlxalq qurumlar və təşkilatlar niyə susurdular? Məgər Fransa Prezidenti bunları bilmir ki, məntiqdən və ədalətdən kənar bəyanat verir”.
Deputat vurğulayıb ki, Azərbaycanın işi haqq işidir və biz öz torpaqlarımız uğrunda vuruşuruq. Qarabağ bizimdir və bizim olacaq!
Bölmənin digər xəbərləri
