HEYDƏR ƏLİYEV ADINA DƏRİN ÖZÜLLƏRİ ZAVODUNUN ƏRAZİSİNDƏ METEOSTANSİYA QURAŞDIRILACAQDIR
Yaxın vaxtlarda Heydər Əliyev adına Dərin özülləri zavodunun ərazisində avtomatlaşdırılmış meteoroloji stansiya quraşdırılacaqdır. Ekologiya və Təbii Sərvətlər Nazirliyinin mətbuat xidmətindən AZƏRTAC-ın müxbirinə bildirmişlər ki, Finlandiyanın “Vaysala” şirkətinin avadanlığı ilə təchiz olunacaq stansiya bütün gün ərzində avtomatik rejimdə Milli Hidrometeorologiya Departamentinin Mərkəzi kommutasiya sisteminə məlumatlar ötürməyə imkan verəcəkdir. İqtisadiyyatın müxtəlif sahələri, o cümlədən neft donanması, dəniz neft-qaz hasilatı idarələri, xarici neft şirkətləri, habelə elmi tədqiqat işlərinin aparılması üçün meteoproqnozların tərtib edilməsində böyük əhəmiyyətə malik məlumatlar avtomatik surətdə seçildikdən sonra müvafiq instansiyalara və beynəlxalq təşkilatlara göndəriləcəkdir. Stansiya atmosfer hadisələrinin müxtəlif cəhətlərini, o cümlədən temperatur, rütubətlilik, küləyin sürəti, atmosfer təzyiqi, yerin təkinin müxtəlif dərinliklərdə temperatur ilə bağlı göstəriciləri öyrənməyə imkan verəcəkdir.
Bu, cari ildə Azərbaycanda quraşdırılan üçüncü stansiyadır. Əvvəlki stansiyalar Pirallahı adasında və Yevlax hava limanı ərazisində qurulmuşdur. Bütün bu tədbirlər “Azərbaycan Respublikasında hidrometeorologiyanın inkişafı Proqramı” çərçivəsində həyata keçirilir.
Bölmənin digər xəbərləri
