Hindistanın sabiq prezidentinin ölümü ilə əlaqədar Banqladeşdə birgünlük matəm elan olunub
Bakı, 1 sentyabr, AZƏRTAC
Hindistanın sabiq prezidenti Pranab Mukercinin vəfatı ilə əlaqədar qonşu Banqladeşdə bir günlük matəm elan olunub.
AZƏRTAC Banqladeş KİV-lərinə istinadla xəbər verir ki, sentyabrın 2-də Banqladeşdə bütün binalarda dövlət bayrağı yarıyadək endiriləcək.
Qeyd edək ki, xəstəxanada 21 gün müalicə alan Hindistanın sabiq prezidenti Pranab Mukerci avqustun 31-də vəfat edib. O, avqustun 10-da trombun çıxarılması üçün əməliyyat olunub. Bundan başqa, sabiq prezidentdə koronavirus aşkarlanmışdı. Pranab Mukercinin ölümü ilə əlaqədar vətənində 7 günlük matəm elan edilib.
Sentyabrın 1-də sabiq prezidentin evində vida mərasimi keçirilib. Hindistan Prezidenti Ram Nat Kovind və Baş Nazir Narendra Modi vida mərasimində iştirak ediblər.
Ölkəsində çox böyük hörmətlə anılan Pranab Mukerci karyerasına müəllim kimi başlayıb, daha sonra jurnalist işləyib. Ölkə parlamentinə 7 dəfə deputat seçilən Pranab Mukerci sonralar Maliyyə, Müdafiə və Xarici İşlər naziri vəzifələrində çalışıb. O, 2012-2017-ci illərdə Hindistanın prezidenti olub.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
