HUMANİTAR YARDIM LAYİHƏLƏRİ HƏYATA KEÇİRİLİR
AZƏRTAC xəbər verir ki, ABŞ Dövlət Departamentinin donorluğu ilə UMCOR Azərbaycan təşkilatı (birləşmiş metodistlərin yardım komitəsi) Əzizbəyov rayonunun Buzovna qəsəbəsindəki vərəm xəstəliyinə tutulmuş uşaqların təhsil aldığı 13 nömrəli internat məktəbi təmir etmişdir. Bununla əlaqədar avqustun 22-də keçirilən mərasimdə ABŞ Dövlət Departamentinin Avropa və Asiya ölkələri üzrə hümanitar proqramların direktoru Cerri Oberndorfer, UMCOR təşkilatının Azərbaycan üzrə ofisinin rəhbəri Fəxriyyə Mehdiyeva, Nazirlər Kabinetinin Qaçqınların, məcburi köçkünlərin problemləri, miqrasiya və beynəlxalq təşkilatlarla iş şöbəsi müdirinin müavini Məhəmməd Məhərrəmov, internat məktəbin direktoru Nizaməddin Məmmədov və başqaları bu təhsil ocağında su təchizatı sisteminin yaxşılaşdırıldığını, sanitar qovşağının, hamam və iki izolyator otağının əsaslı təmir edildiyini bildirmişlər. Vurğulanmışdır ki, Ramanadakı gənc əlillərin əmək və istirahət evində və Şüvəlan qəsəbəsində xəstə uşaqlar üçün internat məktəbdə də təmir-tikinti işləri aparılır. Gələcəkdə bu beynəlxalq qeyri-hökumət təşkilatı respublikamızda bir sıra layihə həyata keçirəcəkdir. Sonda internat məktəbin şagirdləri şeir söyləmişlər.
