Ankara, 9 avqust, AZƏRTAC

Beynəlxalq Dəyirman və Taxıl İstehsalçıları İttifaqının (IAOM) Türkiyədə yerləşən Avrasiya ofisi iqlim dəyişikliyi şəraitində qida təhlükəsizliyi və təchizat zəncirlərinin davamlılığı haqqında qlobal məlumatlılığı artırmaq məqsədilə Bakıda konfrans və sərgi təşkil etməyi planlaşdırır.

AZƏRTAC xəbər verir ki, bu barədə IAOM-un Avrasiya ofisinin cümə günü, avqustun 9-da yaydığı məlumatda deyilir.

Məlumatda qeyd edilir ki, IAOM-un III Avrasiya Konfransı və Sərgisi sentyabrın 23-dən 25-dək Azərbaycanda keçiriləcək.

IAOM-un Avrasiya departamentinin rəhbəri Eren Gürhan Ulusoyun sözlərinə görə, əhali artımı faktoruna və iqlim dəyişikliyinin mənfi nəticələrinə baxmayaraq, dünyada qida istehsalının məhsuldarlığı və həcmi artmaqda davam edir: “Bu məqsədə texnologiyaların təkmilləşdirilməsi və yeni texnoloji inkişafların tətbiqi sayəsində buna nail olmaq olar”.

O, Türkiyənin son 9 ildə dünyada un ixracatçıları siyahısına başçılıq etdiyinə diqqət çəkib. “Ötən ilin sonunda ölkəmiz 3,7 milyon tona yaxın un ixrac edib. 2024-cü ilin yanvar-iyul aylarında xaricə birbaşa un tədarükünün həcmi 7 faiz artaraq 2 milyon tona çatıb ki, bu da Türkiyəyə 777 milyon dollar gəlir gətirib. Ümid edirik ki, ili 4 milyon ton ixrac həcmi ilə başa vuracağıq”, -deyə IAOM-un nümayəndəsi bildirib.

Ulusoy xatırladıb ki, Türkiyədən un ixrac edən şirkətlər üçün ən böyük bazar İraq və Suriyadır.

O, Türkiyənin özündə vəziyyətə toxunaraq qeyd edib ki, yerli istehsal daxili bazarın tələbatını tam ödəyir: “Ölkədə 20 milyon ton taxıl istehsal olunur. Daxili bazarın tələbatını ödəmək üçün də eyni həcm tələb olunur”.

Ramin Abdullayev

AZƏRTAC-ın xüsusi müxbiri

Ankara