“İCTİMAİ İNFORMASİYANIN ŞƏFFAFLIĞI - ÜMUMİ TƏCRÜBƏ” MÖVZUSUNDA SEMİNAR İŞƏ BAŞLAMIŞDIR
Nazirliklərin, dövlət komitələrinin, şirkətlərin və digər rəsmi orqanların mətbuat xidmətləri, ictimaiyyətlə əlaqə şöbələrinin rəhbərlərinin və əməkdaşlarının qatıldığı seminardan əsas məqsəd dövlət idarəçiliyində şəffaflığı təmin etmək, rəsmi informasiyaların ictimaiyyətə çatdırılması praktikasını təkmilləşdirmək, ictimai informasiyanın şəffaflığının artırılmasına yardım etmək, habelə bu sahədə beynəlxalq təcrübəyə yiyələnməkdir.
Prezidentin İcra Aparatının ictimai-siyasi məsələlər şöbəsinin müdiri Əli Həsənov tədbiri açaraq dövlət idarəçiliyinin və ictimai informasiyanın şəffaflığının, eləcə də mərkəzi icra hakimiyyəti orqanları mətbuat xidmətlərinin və ictimaiyyətlə əlaqə şöbələrinin işinin təkmilləşdirilməsi üçün 3 il əvvəl Avropa Şurası ilə birgə işə başlandığını, bugünkü seminarın bu istiqamətdə həyata keçirilən silsilə tədbirlərdən olduğunu bildirmişdir. İndiyədək 15 seminar və Prezidentin İcra Aparatının rəhbəri Ramiz Mehdiyevin iştirakı ilə geniş müşavirə keçirilmişdir.
Bugünkü seminarın bu istiqamətdə həyata keçirilən tədbirlərin yekunu olduğunu qeyd edən Əli Həsənov, mərkəzi və yerli icra hakimiyyəti orqanlarının gündəlik fəaliyyəti haqqında informasiyaların ictimaiyyətə çatdırılması işinin yaxşılaşdırılmasının daim diqqət mərkəzində olduğunu söyləmiş, Avropa Şurası ilə aparılan işin nəticəsi olaraq KİV haqqında mükəmməl qanunların qəbul olunduğunu diqqətə çatdırmışdır. Bundan əlavə, Azərbaycan hökuməti mətbuat xidmətlərinin fəaliyyətinin yaxşılaşdırılması istiqamətində mühüm işlər görmüşdür.
Əli Həsənov ictimai informasiyanın açıqlanmasının təkcə hökumət qurumlarının fəaliyyəti barədə cəmiyyəti məlumatlandırmaq üçün zəruri olmadığını, eləcə də bunu demokratik dövlətin əsas prinsiplərindən biri kimi səciyyələndirmişdir. İctimaiyyətin istər təyinatlı, istərsə də seçkili orqanların gündəlik fəaliyyəti haqqında məlumat almaq hüququ vardır. Dövlət qurumlarının işi şəffaf olmalı, ictimaiyyət mütəmadi olaraq məlumatlandırılmalıdır. Bu istiqamətdə mətbuat xidmətlərinin və ictimaiyyətlə əlaqə şöbələrinin üzərinə böyük iş düşür. Bu xidmətlərin əməkdaşları təmsil etdikləri qurumların fəaliyyətinin ictimaiyyətə çatdırılması işini yüksək səviyyədə təşkil etməlidirlər.
Mətbuat xidməti və ictimaiyyətlə əlaqə şöbəsinin jurnalistlərlə əlaqələrindən söz açan Əli Həsənov, onlar arasında səmimi işgüzar əməkdaşlığın vacibliyini vurğulamışdır. Dövlət qurumlarının fəaliyyətinə verilən ictimai qiymət bu orqanın işi barədə məlumatların vaxtında və dolğun şəkildə cəmiyyətə çatdırılması və ictimaiyyətdə düzgün təsəvvürün yaradılmasından asılıdır.
Əli Həsənov hər bir qurumun mətbuat xidmətinin müvafiq sahəni işıqlandıran jurnalistlərlə vaxtaşırı görüşlər keçirməsinin ümumi işə səmərə verəcəyinə ümidvar olduğunu söyləmişdir.
Azərbaycanda son 7-8 ildə siyasi plüralizmin və mətbuat azadlığının təmin olunması istiqamətində görülən işlərə toxunan Prezidentin İcra Aparatının şöbə müdiri, 1998-ci ildə mətbuat üzərində senzuranın aradan qaldırıldığını bildirmişdir. Hazırda Azərbaycanda informasiya fəaliyyəti ilə məşğul olmaq üçün heç bir dövlət qurumunun icazəsi və ya lisenziyasına ehtiyac yoxdur. Azərbaycan keçmiş SSRİ məkanında yeganə ölkədir ki, kütləvi informasiya vasitələrindən reklam istisna olmaqla heç bir vergi tutulmur. Eləcə də qəzet çapı üçün ölkəyə gətirilən kağız və avadanlıq gömrük rüsumundan azaddır.
Azərbaycan rəhbərliyinin bunları ölkədə demokratiyanın inkişafı, o cümlədən mətbuat azadlığının təmin olunması üçün etdiyini diqqətə çatdıran Əli Həsənov, Prezident İlham Əliyevin bu sahəyə böyük önəm verdiyini söyləmişdir.
Avropa Şurasının mətbuat bölməsinin əməkdaşı xanım Fransiska Klopşer seminarın əhəmiyyətini vurğulamış, Azərbaycan hökumətinin kütləvi informasiya vasitələri ilə bağlı çox mühüm qanunlar qəbul etdiyini bildirmişdir.
Seminarda ictimai informasiyanın əhəmiyyəti, informasiya siyasətində ictimaiyyətlə əlaqənin və əks-əlaqənin əsas xüsusiyyətləri, ictimaiyyətin məlumatlandırılmasında KİV-in yeri və rolu, ictimai informasiyanın açıqlanması metodları, Azərbaycanda bu sahədə qanunvericilik bazası və praktikasına dair müzakirələr aparılmış, Avropa ekspertlərinin məruzələri dinlənilmişdir.
Seminar öz işini iyunun 29-da davam etdirəcəkdir.
Bölmənin digər xəbərləri
