İdarə rəisi: Elektron prokurorluq sistemi cinayət statistikasının operativ təhlilini təmin edir VİDEO
Bakı, 20 fevral, Səbinə Əlizadə, Nailə Həsənova, foto Azər İbrahimov, AZƏRTAC
Elektron prokurorluq informasiya sisteminin tətbiqi cinayət təqibindən kənar icraatların səmərəliliyinin artırılmasında mühüm rol oynayır və cinayətkarlıq vəziyyətinin real vaxt rejimində təhlilinə imkan yaradır.
AZƏRTAC xəbər verir ki, bunu Baş Prokurorluğun Cinayət təqibindən kənar icraatlar idarəsinin rəisi Elnur Musayev
Azərbaycan Hakimlərinin II Forumu çərçivəsində keçirilən "Rəqəmsallaşma və süni intellektin tətbiqi imkanları" adlı panel müzakirəsi zamanı bildirib.
Onun sözlərinə görə, 2022-ci ildə elektron prokurorluq informasiya sisteminin əsas konsepsiyası təsdiqlənib, 2022-ci ilin sonu – 2023-cü ilin əvvəlindən isə sistem tam fəaliyyətə başlayıb. İlkin mərhələdə sənəd dövriyyəsinin elektronlaşdırılması həyata keçirilib, növbəti mərhələdə isə ixtisaslaşmış modullar istifadəyə verilib.
Elnur Musayev qeyd edib ki, hazırda sistem 40-a yaxın modulu əhatə edir və 36 istifadəçi qurum tərəfindən tətbiq olunur. Bu modullar cinayət hadisələrinin qeydiyyatı, materialların araşdırılması, qərarların qəbulu və digər icraat mərhələlərini əhatə edir.
İdarə rəisi deyib ki, elektron cinayət xəritəsinin formalaşdırılması xüsusi əhəmiyyət daşıyır. Müxtəlif dövlət qurumlarından daxil olan məlumatların vahid mərkəzdə toplanması ölkədə cinayət statistikasının və kriminogen vəziyyətin operativ və obyektiv qiymətləndirilməsinə imkan verir.
Çıxışda vurğulanıb ki, rəqəmsallaşma yalnız kağız daşıyıcıların elektron formaya keçirilməsi ilə məhdudlaşmır. Bu proses qərarların qəbul edilməsi mexanizmlərinin avtomatlaşdırılmasını, iş proseslərinin yenidən qurulmasını və idarəetmədə daha çevik yanaşmaların tətbiqini nəzərdə tutur.
Elnur Musayev bildirib ki, rəqəmsallaşmanın dərinləşdirilməsi üçün proseslərin daha çox avtomatlaşdırılması, məlumatların vahid mərkəzdə cəmlənməsi və komanda əsaslı fəaliyyət modelinin gücləndirilməsi zəruridir. Onun sözlərinə görə, bu yanaşma qərarların daha operativ və keyfiyyətli qəbul edilməsinə şərait yaradacaq.
Bölmənin digər xəbərləri
