IDEA neft sənayesinin yaratdığı ekoloji problemlərin həlli ilə bağlı seminar təşkil edib
Bakı, 12 fevral, AZƏRTAC
Fevralın 10-11-də IDEA İctimai Birliyinin Resurs Mərkəzində “Neft sənayesinin yaratdığı ekoloji problemlər və onların həlli yolları” mövzusunda seminar təşkil edilib.
İctimai Birlikdən AZƏRTAC-a bildirilib ki, nəzəri və praktiki hissələrdən ibarət olan seminarda ekologiya, neft-qaz mühəndisliyi və digər müvafiq ixtisaslar üzrə təhsil alan və ya bu sahələrdə çalışan 40-a yaxın gənc iştirak edib.
Seminarın nəzəri hissəsində Dövlət Neft Şirkətinin mütəxəssisi neft sənayesinin yaratdığı ekoloji problemlər və onların aradan qaldırılması yolları, neft hasilatı sənayesində ekoloji standartlar, ölkəmizin bu sahədəki zəngin təcrübəsi və beynəlxalq normalar barədə mühazirə ilə çıxış edib. Sonra mövzu ətrafında müzakirələr və sual-cavab sessiyası keçirilib.
Praktiki hissədə isə iştirakçılar ARDNŞ-in “Eko Parkı”na və Kompleks Tədqiqatlar Laboratoriyasına baş çəkiblər. Gənclər laboratoriyada istifadə edilən avadanlıq, eləcə də onların təyinatı və iş prinsipi ilə yaxından tanış olub, dənizdən və qurudan götürülmüş nümunələrin analiz prosesini izləyib, nəzəri bilikləri praktiki şəkildə sınaqdan keçirmək imkanı əldə ediblər.
IDEA müntəzəm olaraq elmi sessiyalar, praktiki tədris və ingilis dilində ekoloji mövzular üzrə debatlar təşkil edir. Bu barədə məlumatları IDEA-nın onlayn xidmətləri (internet səhifəsi, instaqram və facebook səhifələri) vasitəsilə almaq olar.
Bölmənin digər xəbərləri
