Bakı, 3 oktyabr, AZƏRTAC

Qətərin paytaxtı Dohada ərzaq təhlükəsizliyi və kənd təsərrüfatının inkişafı üzrə İslam Əməkdaşlıq Təşkilatının (İƏT) 9-cu Nazirlər Konfransında çıxış edən təşkilatın Baş katibi Hissein Brahim Taha mövcud milli strategiyalar vasitəsilə sinerji yaratmaq, eləcə də üzv ölkələrdə davamlı kənd təsərrüfatı üçün geniş resursları və imkanları səfərbər etmək məqsədi ilə ərzaq təhlükəsizliyinin təmin edilməsi üzrə strateji planın hazırlanması üzərində iş aparıldığını vurğulayıb.

AZƏRTAC təşkilatın Baş Katibliyinə istinadla xəbər verir ki, İƏT-ə üzv ölkələrin kənd təsərrüfatı və ərzaq təhlükəsizliyi üzrə məsul nazirlərinin, o cümlədən Azərbaycanın kənd təsərrüfatı naziri Məcnun Məmmədovun başçılıq etdiyi nümayəndə heyətinin iştirak etdiyi tədbirdə çıxış edən Baş katib kənd yerlərinin inkişafı və ərzaq təhlükəsizliyinin gücləndirilməsinin əhəmiyyətini vurğulayıb. O qeyd edib ki, İƏT-ə üzv 23 dövlət hələ də dünyada ərzaq çatışmazlığından əziyyət çəkən 44 aşağı gəlirli ölkələr sırasında yer alır. Bu ölkələrin əksəriyyəti Afrikanın cənub-şərqində, Qərbi Asiyanın və Şimal-Şərqi Afrikanın quraqlıq bölgələrində yerləşir. Hissein Brahim Taha vurğulayıb ki, az inkişaf etmiş İƏT ölkələrində kənd təsərrüfatı və ərzaq sistemlərinin inkişafına ciddi və birbaşa diqqət yetirilmədən Dayanıqlı İnkişaf Məqsədlərinə nail olmaq, o cümlədən yoxsulluğu və aclıq təhlükəsini aradan qaldırmaq mümkün deyil.

Baş katib bildirib ki, İƏT-ə üzv dövlətlərin bu həyati vacib sektorda qarşılıqlı əməkdaşlıq üçün çoxlu imkanları var. Kollektiv olaraq, onlar özlərini təmin etmək üçün kifayət qədər əkin sahələrinə, resurslara və texnologiyalara malikdir. O, kənd təsərrüfatı və ərzaq təhlükəsizliyinə sərmayə qoyuluşunun xroniki çatışmazlığını aradan qaldırılması, eləcə də bu həyati vacib sektorda milli potensialın yaradılması üçün əkin sahələrinə və təbii kənd təsərrüfatı sərvətlərinə malik olan ölkələrlə fond və texnologiyalara malik olan dövlətlər arasında tərəfdaşlıq sazişləri imzalamağa çağırıb.