İldırım Məmmədov: Heydər Əliyev həm şəxsiyyət, həm də siyasətçi kimi dahidir
Quba, 10 noyabr, Elxan Yusifli, AZƏRTAC
Mən siyasətçilər, tarixi şəxsiyyətlər haqqında çox oxuyuram. Ulu Öndərimizlə müqayisə olunacaq çox az sayda liderlər var. Böyük dövlət xadimi Heydər Əliyev xalqımızın birliyi, ölkəmizin müstəqilliyinin möhkəmlənməsi, müasir Azərbaycanın qurulması üçün əvəzsiz xidmətlər göstərib. Ümummilli lider Heydər Əliyev həm şəxsiyyət, həm də siyasətçi kimi dahidir.
Bu sözləri AZƏRTAC-ın bölgə müxbirinə açıqlamasında Quba Rayon Ağsaqqallar Şurasının sədri İldırım Məmmədov söyləyib.
“Mənə ulu öndərimiz Heydər Əliyevlə görüşmək, onun rəhbərliyi ilə keçən iclaslarda çıxış etmək nəsib olub. Yaxşı yadımdadır, torpaq islahatları ilə bağlı iclasların birində gərgin müzakirələr gedirdi. Mütəxəssislər, alimlər, dövlət rəsmiləri fikirlər söyləyirdi. Mən də çıxış etmək üçün əlimi qaldırıb söz istədim. Ulu Öndərə məlumat verdilər. O, isə öz növbəsində çıxış etmək istəyənin kimliyini soruşdu. Qubadan gələn fermer olduğumu bilib, dərhal çıxış etməyimə icazə verdi. Məni çox diqqətlə dinlədi, bəzi suallar ünvanladı. Çünki torpaq islahatları ilə bağlı müzakirələrdə yerli təsərrüfatçıların, fermerlərin fikirlərinə böyük önəm verirdi”, - deyə İldırım Məmmədov qeyd edib.
İldırım Məmmədov müsahibəsində bildirib ki, Qubanın meyvəçilik rayonu kimi formalaşması ümummilli lider Heydər Əliyevin adı ilə bağlıdır. Heydər Əliyevin Azərbaycana rəhbərlik etdiyi illərdə respublikamızda, xüsusən də Qubada bağçılığın inkişafı dövlət siyasətinin tərkib hissəsinə çevrilmişdi. Ümummilli Liderin təşəbbüsü ilə 1974-cü ildə “Meyvəçiliyin intensivləşdirilməsi və ixtisaslaşdırılması əsasında daha da inkişaf etdirilməsi tədbirləri haqqında” ayrıca hökumət qərarının qəbul olunması ölkəmizdə bağçılıq təsərrüfatının inkişafında, sözün əsl mənasında, yeni mərhələnin başlanğıcı oldu.
Ümummilli Liderin təşəbbüsü ilə verilən həmin qərara əsasən bir neçə il ərzində təkcə Quba rayonunda 14 min hektar sahədə intensiv tipli yeni bağlar salındı. O vaxtadək Azərbaycanın heç bir rayonunda intensiv tipli bağ yox idi. 1984-cü ildə Quba bağbanları intensiv tipli bağlardan rayonun tarixində ilk dəfə olaraq 100 min tondan çox meyvə toplamağa müvəffəq oldular.
“Azərbaycanın hansı bölgəsinə, hansı rayonuna diqqət yetirsəniz, oranın inkişafında Heydər Əliyevin böyük xidmətlərinin olduğunu görərik. Hazırda Qubada 20 min hektara yaxın meyvə bağı var ki, bunun da 15 min hektarı alma bağlarıdır. Qubanın meyvəçilik rayonu kimi tanınmasına görə Ulu Öndərimizə minnətdarıq. 1983-cü ildə ulu öndər Heydər Əliyev Qubaya səfər etmiş, qubalılarla mehriban və səmimi görüşlər keçirmişdi. O, bu səfər zamanı vaxtilə özünün təşəbbüsü ilə salınmış meyvə bağlarında oldu, kənd əməkçiləri, eləcə də Qubanın ağsaqqalları, veteranları, ziyalıları ilə unudulmaz görüşlər keçirdi. Həmin vaxt salınan bağlardan indi də məhsul toplanır. Yerli camaatın böyük hissəsi indi alma bağlarından gələn gəlir hesabına büdcəsini formalaşdırır”, - deyə İldırım Məmmədov qeyd edib.
Quba Rayon Ağsaqqallar Şurasının sədri söyləyib ki, bütün varlığı ilə Vətəninə, xalqına bağlı olan dünyaşöhrətli dövlət xadimi Heydər Əliyev respublikamıza rəhbərliyinin bütün dövrlərində Vətən və xalq qarşısında misilsiz xidmətlər, xilaskarıq missiyası, zəngin dövlətçilik nümunəsi göstərib. Ümummilli Lider qəlblərdə daimi sevgi, xatirələrdə əbədiyaşarlıq qazanıb.
Bölmənin digər xəbərləri
