Məsəl var, deyərlər, ağac kökündən su içər. Təbii ki, kök əsasdır, ancaq ağacı ağac edən, yayın qızmarında, qışın şaxtasında onu qoruyan, yaşadan qollu-budaqlı çətirin olması da vacibdir. Ölkəmizin indiki Prezidenti, 46 yaşı yenicə tamam olmuş İlham Əliyev Azərbaycan üçün məhz bu cür “çətir” olmuşdur. Taleyini bu insana etibar etmiş Azərbaycan xalqının ona həvalə etdiyi vəzifələrin yerinə yetirilməsi üçün bu yaş kifayət qədər cavan və eyni zamanda, yetkin sayıla bilər. XXI əsrdə millətimizin gələcəyinə görə bütün məsuliyyəti öz üzərinə götürmək, ölkəni dünya miqyasında təmsil etmək çox məsul və həm də şərəfli vəzifədir. Dahi Heydər Əliyevin layiqli oğlu olan İlham Əliyev ümummilli liderimizdən estafeti qəbul edərək, onun siyasi xəttini uğurla davam etdirir, xalqımızı və ölkəmizi tərəqqiyə, inkişafa və firavanlığa doğru aparır.

Elitar təfəkkürə malik olan bu insan cəmiyyətin bütün təbəqələri ilə sıx əlaqə yaratmaqla artıq sübut etmişdir ki, İlham Əliyevin hakimiyyəti bütün Azərbaycan xalqının hakimiyyəti deməkdir.

İlham Əliyevin fikrincə, siyasət boş sözlərə, şüarlara deyil, məhz real əməli işlərə əsaslanmalıdır. Azərbaycan Prezidentinin gördüyü işlərin çoxu onun bir siyasi xadim kimi yetkinliyinə, vəziyyətin mümkün inkişafını təkcə ölkə miqyasında deyil, həm də bütün geosiyasi proses çərçivəsində qabaqcadan görə bilmək qabiliyyətinə dəlalət edir. Demək lazımdır ki, hakimiyyətdə olduğu müddətdə o, seçkiqabağı kampaniyanın gedişində xalqa verdiyi bütün vədlərinə əməl etmişdir.

Çalışqanlıq, əməksevərlik, ətrafdakı insanlara diqqət və qayğı, təmkinlilik ona yeniyetməlik və gənclik dövründən xas olan keyfiyyətlərdir.

İlham Əliyev “Azərbaycan” qəzetinin 2007-ci il 23 dekabr tarixli nömrəsində dərc edilmiş “Mənim universitetlərim” adlı məqaləsində yazır: “Mənim təhsil illərimdə çoxları elə bilirdi ki, Heydər Əliyevin oğlu ağına-bozuna baxmadan atasının vəzifəsindən sui-istifadə edəcək. Ona hər şey bağışlanar. Ancaq atam mənə uşaqlıqdan izah etmişdi ki, belə hallara yol vermək olmaz, mən də bədxahların (onlar həmişə çox olublar) ailəmizə hücum etmələri üçün heç bir bəhanə verməmişəm”.

Moskva Dövlət Beynəlxalq Münasibətlər İnstitutunun arxivində İlham Əliyevin qiymət kitabçası saxlanılır. O, əlaçı tələbə olmuş və institutu “qırmızı” diplomla bitirmişdir. Ali məktəb müəllimlərinin İlham Əliyev barədə fikirləri də birmənalıdır: “İlham təvazökar, alicənab və ləyaqətli insandır, atasına layiq oğuldur. Biz də fəxr edirik ki, o, institutumuzun məzunları arasında ilk Prezidentdir. Özü də çox layiqli Prezidentdir!”.

Heydər Əliyev bütün bilik və bacarığını, təcrübəsini İlham Əliyevə öyrətmiş, müxtəlif vəzifələrdə sınamaqla, müxtəlif danışıqlara cəlb etməklə, onun nəzəri və praktik hazırlığı üçün çox iş görmüşdür. Zaman göstərir ki, Heydər Əliyev oğlunun gələcəyi barədə düşündüyündən daha çox öz işinin layiqli davamçısı barədə, Azərbaycanın gələcəyi barədə düşünmüşdür.

Vaşinqtonun nüfuzlu Con Hopkins Universiteti nəzdindəki Mərkəzi Asiya və Qafqaz Araşdırmaları İnstitutunun rəhbəri Frederik Starın AZƏRTAC-ın xüsusi müxbirinə eksklüziv müsahibəsində dediyi kimi, “Prezident İlham Əliyevin ən güclü cəhətlərindən biri odur ki, onun üçün daim diqqət mərkəzində olmaq əhəmiyyətli deyildir. O, bacarıqlı, tarazlı, düşünülməmiş qərarlara yol verməyən, rəyi ilə razılaşmadığı insanlara ehtiramla yanaşan bir şəxsiyyətdir. Mən onun Azərbaycandakı müxalifət nümayəndələri barədə hörmətlə danışdığını dəfələrlə eşitmişəm. O, şəxsi hissləri siyasətdən ayıra bilən adamdır. Bunların hamısı çox məsuliyyətli insana xas olan xüsusiyyətlərdir. Məncə, o, indiyə qədər ölkəsinə çox gözəl xidmət edib”. Bəli, məhz xidmət etmişdir, çünki vətəndaş üçün, insan üçün bundan böyük amal yoxdur.

İlham Əliyev hakimiyyətə gəldiyi ilk günlərdən Azərbaycana sədaqətlə xidmət etmiş, dövlət təsisatlarını möhkəmlətmiş, hakimiyyət strukturlarında islahatlar aparmış, təbii sərvətlərdən əldə edilən gəlirlərin idarə olunması üçün səmərəli vasitələr yaratmışdır. O, gəlirlərin həcminə görə cəmiyyətin qütbləşməsinin qarşısını almaq üçün tədbirlər görmüş, ölkənin gəlirlərinin əhali arasında ədalətli bölüşdürülməsi üçün əlindən gələni etmişdir və edir.

Bu baxımdan dövlətimizin başçısının regionların inkişafına yönəlmiş fəaliyyəti çox böyük, bəlkə də, öncül əhəmiyyət kəsb edir. Prezident daim bölgələrdə olur, ictimaiyyətlə görüşür, hər kəsi diqqətlə dinləyir. Regionlarımız sürətlə və intensiv inkişaf edir, yeni iş yerləri ilə yanaşı, müalicə-sağlamlıq ocaqları, idman və mədəniyyət kompleksləri açılır. Bunları heç kəs inkar edə bilməz.

Qaçqınların və məcburi köçkünlərin vəziyyəti daim Prezidentin diqqət mərkəzindədir. Dövlət proqramına uyğun olaraq, bu günlərdə Saatlı və Sabirabad rayonlarında axırıncı çadır düşərgələri ləgv edilmişdir. İlham Əliyev bu məsələdə də öz sözünə sadiq qalmışdır.

Ümummilli liderin xəttini davam etdirən Prezident incəsənət xadimlərinə həqiqətən atalıq qayğısı göstərir, onları mənəvi və maddi baxımdan dəstəkləyir. Mədəniyyət ocaqları - teatrlar, muzeylər və başqa obyektlər yenidən qurulur, təmir edilir və bu, paytaxtımızın simasına bənzərsiz çalarlar gətirir.

İlham Əliyev ölkəmizin müstəqilliyinin təminatçısıdır. Azərbaycan cəmiyyəti ardıcıl demokratikləşmə yolu ilə irəliləyir, demokratik təsisatlar inkişaf etdirilir. Dünya birliyinə inteqrasiya xəttini seçmiş Azərbaycan hüquqi dövlət quran mütərəqqi xalqlar ailəsində öz layiqli yerini tutmuşdur.

Türkiyə və Gürcüstanla sıx əməkdaşlıq şəraitində Azərbaycan həqiqətən irimiqyaslı, transmilli layihələri gerçəkləşdirmişdir. Bu layihələr ölkənin iqtisadi inkişafının sürətlənməsində, əhalinin həyat səviyyəsinin yüksəldilməsində mühüm rol oynamaqla, regionda təhlükəsizliyin və sabitliyin təminatına çevriləcəkdir.

Prezident İlham Əliyevin bacarıqla idarə etdiyi dövlətimiz Cənubi Qafqazda lider dövlətə çevrilmişdir. Artıq bir neçə ildir ki, Azərbaycan iqtisadi artım göstəricilərinə görə dünyada ən qabaqcıl ölkələrdən biridir. O, borcalan ölkədən kredit verən ölkəyə çevrilmişdir.

Ölkəmizin Prezidenti Qarabağ probleminin həlli istiqamətində də çox işlər görmüşdür. Xarici müşahidəçilər dəfələrlə qeyd etmişlər ki, İlham Əliyev danışıqlar prosesinin təmkinli məcraya düşməsində mühüm rol oynamışdır. Qarabağ probleminin dinc yolla həll edilməsinin tərəfdarı olan Prezident, eyni zamanda, açıq-aşkar bəyan edir ki, Azərbaycanın öz torpaqlarını istənilən şəkildə, o cümlədən hərbi yolla işğaldan azad etmək, ərazi bütövlüyünü bərpa etmək üçün bütün imkanları vardır.

Bu yerdə xalq artisti professor Arif Məlikovun sözləri yada düşür: “Xarizma - təkcə bəlağət deyil, insanın məziyyətlərinin məcmusu, sözlə işin vəhdəti, naturanın bütövlüyü deməkdir. Bir sözlə, möhkəm ictimai rəğbət bu keyfiyyətlərdən yaranır. Azərbaycan dövlətinin başçısının nüfuzu və populyarlığının təbiəti də belədir”.