“Vaxtilə Heydər Əliyev əsas funksiyanı yerinə yetirmişdir - dövlətçiliyi yaratmış və möhkəmləndirmişdir. İlham Əliyev öz Prezidentliyinin birinci müddətində ölkənin geoiqtisadi amilini irəlilətmək üçün əsas işi görmüşdür. Tam əminliklə demək olar ki, gələcəkdə o, ölkənin hərtərəfli modernləşdirilməsinə yönəlmiş tədbirlər kompleksini tam həcmdə həyata keçirəcəkdir”.

Ramiz Mehdiyev

                                             “Gələcəyin strategiyasını müəyyənləşdirərkən:

                                               modernləşmə xətti”

                                              (“Azərbaycan” qəzeti, 16 yanvar 2008-ci il).

Azərbaycanda qarşıdakı prezident seçkilərinin əvvəllər keçirilmiş seçkilərdən əsas fərqi ayrı-ayrı namizədlər arasında deyil, ölkənin gələcəyinə baxışlar arasında mübarizədən ibarət olacaqdır.

İstər yerli, istərsə də əcnəbi təhlilçilərin fikrincə, qarşıdakı prezident seçkilərinin şəksiz favoriti İlham Əliyev olacaq, çünki o, xalqa nə təklif edəcəyini bilir, “iqtidar seçkilərə yeni, sanballı siyasi, iqtisadi və sosial təkliflər ehtiyatı ilə gedir”.

Bir daha xatırlatmaq yerinə düşər ki, indiki Prezident özünün seçkiqabağı proqramında xalqa verdiyi bütün vədləri yerinə yetirmişdir, ona görə də deyə bilərik ki, qarşıdakı seçkilərdə onun qalib gəlmək şansı çox yüksəkdir.

Rusiya Federasiya Şurası sədrinin müavini Svetlana Orlova hesab edir ki, hazırda Prezident İlham Əliyev Azərbaycanı çox yüksək nailiyyətlərə qovuşdurur və onun yeritdiyi siyasi və iqtisadi xəttin bəhrələri göz qabağındadır. S.Orlova əmindir ki, İlham Əliyevin siyasi xəttinin varisliyi qorunub saxlanılarsa, Azərbaycanı çox yaxşı gələcək gözləyir.

Britaniyada çıxan nüfuzlu “Financial Times” qəzetində ölkəmiz haqqında dərc edilən silsilə məqalələrin müəllifləri də bu fikirdədirlər. Onlar İlham Əliyevin Prezident olduğu illərdə Azərbaycanın qazandığı uğurları sadalayıb qiymətləndirərək bu qənaətə gəlirlər ki, 2008-ci ildə keçiriləcək seçkilərdə onun qalib gələcəyinə şübhə yoxdur.

Qəzet yazır: “Moskvada təhsil almış, ingilis dilində (biz isə əlavə edək ki, Azərbaycan və rus dilləri öz yerində, fransız, türk dillərində də) sərbəst danışan, qərbyönümlü islahatlara sadiq olan Azərbaycan Prezidenti İlham Əliyevin qarşıdan gələn prezident seçkilərində qələbə qazanacağına şübhə edənlərin sayı çox azdır. Zəif vəziyyətdə olan müxalifətin isə onun prezident seçilməsi yolunda hər hansı problem yaradacağı gözlənilmir. Azərbaycan cəmiyyətində dəstəyi olmayan müxalifət təcrid edilmiş vəziyyətdə qalmışdır”.

Hazırda müxalifət, həqiqətən, xalqın nəzərində nüfuzunu itirmişdir, çünki nüfuz siyasi iddialarla deyil, gündəlik gərgin işlə qazanılır. Elə həmin iddialar müxalifət liderlərinin birləşməsinə imkan verməyəcəkdir.

Əlbəttə, istənilən demokratik dövlətdə müxalifət olmalıdır, lakin söhbət hökumət orqanlarının işini təshih edən, yeni təkliflərlə, işə yaradıcı yanaşmalarla hökumətə kömək edən konstruktiv müxalifətdən gedir.

Lakin S.Orlovanın dediyi kimi, əgər müxalifət kənardan maliyyələşdirilirsə və “ölkəni dağıtmağa çalışırsa, bu, artıq vəziyyətin sabitliyini pozmaq məqsədi güdən, öz ağalarının maraqlarına xidmət edən qeyri-konstruktiv müxalifətdir”.

Demokratik şəraitdə keçirilmiş əvvəlki prezident seçkilərində İlham Əliyev inamlı qələbə qazanmışdır. O vaxt ölkəmiz demokratiya sınağından uğurla çıxdı, hətta seçicilərin barmaq izlərinin götürülməsi proseduruna da icazə verildi. Bütün bunların yeganə məqsədi o idi ki, səsvermə prosesinin demokratik olmasına heç kəs zərrə qədər də şübhə etməsin. Lakin vaxt keçir, amma müxalifət öz siqlətini dəyişmir, hər növbəti seçkilərdən sonra guya onların saxtalaşdırıldığı barədə tamamilə əsassız bəyanatlar səslənir.

Milli Məclisin İnsan hüquqları üzrə daimi komissiyasının sədri Rəbiyyət Aslanovanın fikrincə, “bütün bunlar müxalifətin uydurmalarıdır. Azərbaycanda sabitliyin pozulması dövrü artıq çoxdan keçmişə qovuşmuşdur. Bizim vətəndaşlar seçkilərdə öz iradələrini qanuna uyğun olaraq ifadə edirlər. Bugünkü seçicilər 5-6 il bundan əvvəlki seçicilər deyil, onlar siyasi hadisələrin mahiyyətini düzgün başa düşürlər”.

Məlum olduğu kimi, ANS şirkətlər qrupu və Milli Qəhrəman Çingiz Mustafayevin adını daşıyan Fond Azərbaycan Prezidenti İlham Əliyevi “2007-ci ilin adamı” elan etmişdir. Xatırladaq ki, “İlin adamı” mükafatı təsis ediləndən bəri Azərbaycanın həyatında çox böyük rol oynamış insanlar həmin mükafatın laureatı adına layiq görülmüşlər. Dövlətimizin başçısı İlham Əliyevin Azərbaycanda “İlin adamı” elan olunması ölkəmizin dünyada mövqelərinin möhkəmləndirilməsi, səriştəli və tarazlı xarici siyasət yeridilməsi, Azərbaycan vətəndaşlarının maddi rifahının yaxşılaşdırlması, döyüş qabiliyyətli ordu quruculuğu istiqamətində onun gördüyü böyük işə verilən layiqli qiymətdir.

Yeni Azərbaycan Partiyası Siyasi Şurasının üzvü, Milli Məclisin deputatı Aydın Mirzəzadə bildirir ki, qarşıdan gələn prezident seçkiləri Azərbaycanda demokratiya üçün daha bir imtahan olacaq və ölkəmiz bu imtahandan üzüağ çıxacaqdır. “İnanıram ki, bu mübarizədə Azərbaycanın Prezidenti, Yeni Azərbaycan Partiyasının sədri cənab İlham Əliyev şəksiz üstünlüyə malik olacaqdır. Əminəm ki, o, qarşıdakı seçkilərdə rəqiblərinin hamısını xeyli üstələyərək qalib gələcəkdir”.

YAP icraçı katibinin müavini, Milli Məclisin deputatı Mübariz Qurbanlı deyir ki, hakim partiya seçkilərə hazırlıq üçün hələ 2007-ci ildə öz səylərini fəallaşdırmışdır. “Əsas məsələ budur ki, biz seçkilərə dəqiq və aydın proqramla gedirik. Axı, İlham Əliyev Prezident olduğu bütün müddətdə özünü göstərə bilmişdir.

Azərbaycan iqtisadi inkişaf səviyyəsinə görə Cənubi Qafqazda liderdir. Biz ölkəmizin həm xarici, həm də daxili siyasətində uğurlar qazanmışıq. Əminik ki, seçicilər bu faktları nəzərə alacaq və yenə İlham Əliyevə səs verəcəklər”.

Bəzi partiyalar, məsələn, “Vəhdət” və “Ana Vətən” partiyaları artıq bəyan etmişlər ki, onlar qarşıdan gələn seçkilərdə indiki Prezident İlham Əliyevin namizədliyini dəstəkləməyə hazırlaşırlar. Siyasi partiyalar arasında hələ qəti qərara gəlməyənlər də var, bəziləri Seçki Məcəlləsinin müəyyən müddəalarından narazıdır və ona dəyişikliklər olunmasını tələb edirlər.

Rəbiyyət Aslanova “1-st News” üçün verdiyi müsahibədə bildirir ki, əslində, həmin sənəd tamamilə demokratikdir. “Hazırda qüvvədə olan Seçki Məcəlləsini hazırlayarkən biz onun layihəsini Avropanın ən nüfuzlu təşkilatları ilə müzakirə etmişik, onların rəylərini və tövsiyələrini nəzərə almışıq. Bu Məcəllə əsasında parlament və bələdiyyə seçkiləri keçirilmişdir, indi də prezident seçkilərinə hazırlaşırıq. Bir sözlə, bu, kifayət qədər mükəmməl sənəddir”. Rəbiyyət Aslanova deyir ki, müxalifət hələ də köhnə, vaxtı keçmiş təsəvvürlərin və iş metodlarının əsarətindən xilas ola bilmir.

Azərbaycan Prezidentinin İcra Aparatının rəhbəri akademik Ramiz Mehdiyevin fikrincə, indi Azərbaycan özünün yetkinlik imtahanının yeni mərhələsinə yaxınlaşır.

R.Mehdiyevin “Gələcəyin strategiyasını müəyyənləşdirərkən: modernləşmə xətti” adlı məqaləsində deyilir: “Son illərdə təkcə meqapolisin deyil, bölgələrin də siması ciddi şəkildə dəyişmişdir. İctimai şüur postmodernist meyilləri latent şəkildə transformasiya edir və sonrakı illərdə bu meyillər gələcəyin strategiyasını müəyyən edəcəkdir. Lakin İlham Əliyevin daxili və xarici siyasət sahəsində fəaliyyətini hələ ciddi şəkildə və qərəzsizliklə qiymətləndirmək lazımdır. İndi bunu etmək çətin deyil, hərçənd bəzən səslənən tənqidlər real təhlil aparmağa mane olur. Lakin növbəti beş il üçün Prezident İlham Əliyevin fəaliyyətinin gündəliyi artıq indidən aydındır”.

Qarşıdan seçkilər gəlir. Özümüz üçün, ölkəmiz üçün hansı gələcəyi seçməyimiz yalnız bizdən asılıdır. Sağlam düşüncə deyir ki, suveren milli dövlətdə yaşayan, özünün milli inkişaf strategiyasını müəyyən etmək imkanına malik olan müdrik xalqımız düzgün yol - modernləşmə yolunu seçəcəkdir.