İndoneziya saytı Azərbaycanda parlament seçkilərini müşahidə etmiş jurnalistin məqaləsini yayıb
Cakarta, 15 fevral, AZƏRTAC
İndoneziyanın sindonews.com saytı Azərbaycanda fevralın 9-da keçirilmiş parlament seçkiləri barədə jurnalist Mohamad Antoninin məqaləsini yayıb.
“İndoneziyalı müşahidəçilər Azərbaycanda seçkilərin gedişini izləyiblər” adlı məqalədə əvvəlcə ölkəmiz barədə ümumi məlumat verilib. Onun 1991-ci ildə keçmiş SSRİ-nin dağılmasından sonra müstəqilliyini bərpa etdiyi qeyd edilib.
Parlament seçkilərində 125 yer uğrunda 1314 namizədin mübarizə apardığı indoneziyalı oxucuların diqqətinə çatdırılıb. Qeyd edilib ki, İndoneziyadan xüsusi olaraq dəvət edilmiş müşahidəçilər - bir deputat və iki jurnalist Bakı şəhərindəki seçki məntəqələrində seçkilərin gedişini izləyiblər. Onlarla birlikdə yüzlərlə əcnəbi və yerli müşahidəçilərin, jurnalistlərin seçkiləri izlədiyi də məqalədə öz əksini tapıb.
Məqalədə seçkiöncəsi kampaniya dövründən fərqli olaraq səsvermə günü hər yerdən namizədlərin fotolarının və plakatların yığışdırıldığı bildirilib. Qeyd edilib ki, seçki məntəqələri yerləşən məktəblərdə və digər ictimai binalarda səsvermə üçün müvafiq şərait yaradılıb.
Daxil olduqları ilk seçki məntəqəsində Ermənistan tərəfindən işğal edilmiş ərazilərdən olan qaçqın və məcburi köçkünlərlə qarşılaşdıqlarını qeyd edən indoneziyalı jurnalist bu insanların müvəqqəti yaşayış yerlərində səsverməsi üçün lazım olan şəraitin yaradıldığını bildirib. Onları müşahidə edən Murad adlı azərbaycanlı gəncin valideynlərinin də işğal altındakı ərazilərdən olduğunu oxucuların diqqətinə çatdırıb. Əlavə olaraq bildirib ki, Murad hazırda Avstraliyanın Sidney şəhərində təhsil alır.
İndoneziyalı oxuculara seçki məntəqəsindəki proses barədə məlumat verən jurnalist qeyd edib ki, seçicilər tam sərbəst şəkildə namizədlərin adlarının əks edildiyi vərəqələri götürərək, xüsusi köşklərdə istədikləri namizədin qarşısında işarə qoyaraq onu şəffaf qutulara atırdılar. Bu zaman məntəqə nümayəndəsi onların baş barmağına xüsusi maye püskürür ki, bu da həmin şəxsin təkrar səsverməsinin qarşısını almaq məqsədilə edilir.
Məqalədə müşahidə qrupunun olduğu digər seçki məntəqələrindəki vəziyyət barədə də ətraflı məlumatlar öz əksini tapıb. Hər bir seçki məntəqəsində komissiya üzvləri ilə yanaşı, müşahidəçilərin, namizədlərin vəkillərinin olması barədə məlumat verilib.
Həm seçki günü, həm də seçkiöncəsi vəziyyət barədə məlumat verən jurnalist qeyd edib ki, gənc nəsil bu seçkilərə xüsusi həvəslə qatılıb. Namizədlərin 90 faizinin 40 yaşadək gənclərdən, beşdə birinin isə qadınlardan ibarət olması ölkədə aparılan islahatların mühüm tərkib hissəsi kimi qəbul edilir. Məqsəd ölkədə aparılan islahatların daha da dərinləşdirilməsi və istedadlı, peşəkar gənclər üçün yolun açılmasıdır.
Seçkilərdə Yeni Azərbaycan Partiyasının qalib gəldiyi qeyd edilib.
Vurğulanıb ki, Prezident İlham Əliyev gənclərin qüvvəsindən istifadə edərək Azərbaycanda aparılan islahatları daha da sürətləndirir və dərinləşdirir.
Məqalədə Azərbaycanın müstəqil xarici siyasət yeritdiyi xüsusi qeyd edilib.
Vüqar Ağayev
AZƏRTAC-ın xüsusi müxbiri
Cakarta
Bölmənin digər xəbərləri
