İndoneziyanın Bakrie Universitetində Ümummilli Liderin 100 illiyinə həsr olunan tədbir keçirilib
Pekin, 15 iyun, AZƏRTAC
Azərbaycanın İndoneziyadakı səfirliyi bu ölkənin Bakrie Universitetində Ümummilli Lider Heydər Əliyevin anadan olmasının 100 illiyi və 15 İyun - Milli Qurtuluş Günü ilə əlaqədar “Gənc liderlərin yetişdirilməsi: Heydər Əliyev liderliyindən öyrənilmiş dərs” mövzusunda tədbir keçirib.
Səfirlikdən AZƏRTAC-a bildiriblər ki, tədbir iştirakçıları əvvəlcə Ümummilli Lider Heydər Əliyevin həyat və fəaliyyətini əks etdirən fotosərgi ilə tanış olublar.
Hər iki ölkənin Dövlət himnləri səsləndikdən sonra görkəmli dövlət xadimi Heydər Əliyevin həyatına, onun Azərbaycanın tarixində oynadığı misilsiz rola və əldə etdiyi nailiyyətlərə həsr olunan sənədli film nümayiş edilib.
Azərbaycan səfiri Cəlal Mirzəyev görkəmli siyasi xadim Heydər Əliyevin həyat və fəaliyyətindən, onun Azərbaycan tarixindəki yerindən, eləcə də dövlətimizin dünya miqyasında tanınması istiqamətindəki əvəzsiz xidmətlərindən danışıb. Diplomat iki ölkə arasındakı mehriban dostluq münasibətlərinə də toxunaraq, bu əlaqələrin arzuolunan müstəvidə inkişafından bəhs edib.
Universitetin prorektoru rektor Tri Andika Kurniavan belə bir tədbirin Bakrie Universitetində təşkili üçün qurur hissi yaşadıqlarını söyləyib. Ölkələrimiz arasındakı xoş münasibətlərdən danışan natiq tədbirin buna bariz nümunə olduğunu bildirib. Heydər Əliyevin dünyada məşhur siyasətçilər sırasında xüsusi yer tutduğunu və hazırkı güclü Azərbaycanın ərsəyə gəlməsində dahi siyasətçinin önəmli rolunun danılmaz olduğunu vurğulayıb.
Sonra siyasi elmlər ixtisası üzrə təhsil alan tələbələr arasında təşkil edilmiş “Heydər Əliyev” təqaüdü müsabiqəsinin qalibi Syhilla Putri Nadiaya mükafat təqdim edilib.
Qeyd olunan müsabiqə universitetdə siyasi elmlər ixtisası üzrə təhsil alan 237 tələbə arasında onlayn formatda keçirilib. Son mərhələyə keçmiş 3 nəfər arasında Heydər Əliyevin fəaliyyəti barədə daha ətraflı məlumata malik olan Syhilla Putri Nadia qalib olub.
Tədbirdə çıxış edən “Heydər Əliyev” təqaüdünün qalibi Azərbaycan xalqının Ümummilli Liderinin bir siyasətçi kimi mühüm rolu barədə danışıb və bu təqaüdə layiq görüldüyü üçün qürur hissi keçirdiyini deyib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
