İngiltərədə qan xərçəngi ilə mübarizədə yeni müalicə üsulu tətbiq olunacaq
London, 13 iyun, AZƏRTAC
İngiltərədə qan xərçəngi xəstələri dünyada ilk dəfə olaraq inqilabi “Troya atı” adlı yeni müalicə üsuluna çıxış əldə edəcəklər.
AZƏRTAC BBC-yə istinadla xəbər verir ki, İngiltərənin Milli Səhiyyə Xidmətinin təsdiqlədiyi bu müalicə xərçəng hüceyrələrini içəridən hədəfə alaraq onların yayılmasının qarşısını alır.
“Blenrep” kimi tanınan “Belantamab mafodotin” adlı preparat müalicənin fayda vermədiyi və ya xərçəngi inkişaf etmiş çoxsaylı mieloma (sümük iliyi xərçəngi) xəstələri üçün nəzərdə tutulub. Bu dərman hər üç həftədən bir digər dərmanlarla birlikdə infuziya şəklində verilir və xərçəng hüceyrələrinə yapışaraq onları hədəfə alır.
Tədqiqatlara görə, yeni terapiya mövcud müalicələrə nisbətən xəstəliyin inkişafını təxminən üç dəfə ləngidir. Bu müalicədən hər il təxminən 1500 mieloma xəstəsinin faydalanacağı gözlənilir.
İngiltərənin Milli Səhiyyə Xidməti bu dərmanı tətbiq edən ilk səhiyyə sistemi olacaq.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
