AZƏRTAC xarici informasiya mənbələrinə istinadla bildirir ki, Dünya Vəhşi Təbiət Fondunun bu günlərdə yayılmış məruzəsinə görə, bəşəriyyət Yer kürəsinin bərpa edə biləcəyindən 20 faiz çox təbii ehtiyat istehlak edir. Fondun baş direktoru Klod Martin demişdir ki, “biz təbii ehtiyatlardan onların bərpa olunmasından daha tez istifadə edirik”. Onun fikrincə, vəziyyətdən çıxış yolu ehtiyatların istehlakı ilə onların bərpası arasında tarazlığı təmin etməkdir. Bunun üçün isə hökumətlərin iradəsi gərəkdir.

Fondun məruzəsindəki göstəricilərə görə, 1970-2000-ci illər arasındakı dövrdə quruda və dənizdəki növlərin sayı 30 faiz, şirin sulardakı növlərin populyasiyası isə 50 faiz azalmışdır. Fondun ekspertləri hesab edirlər ki, bu, insanların qida məhsullarına, sənaye materiallarına, enerjiyə və suya artan tələbatının birbaşa nəticəsidir.

Mütəxəssislərin hesablamaları göstərir ki, insanların təbiətə təsiri 1961-ci illə müqayisədə 2,5 dəfə artmışdır. Planetin hər bir sakininin tələbatını ödəmək və həyat fəaliyyəti tullantılarının emalı üçün 2,2 hektar torpaq lazım olduğu halda, 1,8 hektar torpaq düşür.

Özü də Şimali Amerika sakini üçün 9,5 hektar məhsuldar torpaq və su sahəsi lazımdır ki, bu da avropalıların tələbatından 2 dəfə, Afrika və Asiya sakinlərinin tələbatından isə 7 dəfə çoxdur.

Həmin dövr ərzində energetika sahəsində yüklənmə komponenti 700 faiz artmışdır. Yeraltı yanacaq, yəni daş kömür, neft, təbii qaz istehlakının getdikcə arması yandırılma nəticəsində çıxan karbon qazının udulması üçün zəruri olan ərazinin genişlənməsinə səbəb olmuşdur. Fondun mütəxəssisləri bildirirlər ki, bu yanacaq növlərinin həddindən çox işlədilməsi bəşəriyyəti qlobal iqlim dəyişmələri təhlükəsi qarşısında qoyur.