İQTİSADİ İNKİŞAF NAZİRLİYİNİN MƏLUMATI
Xəbər verdiyimiz kimi, Azərbaycan Respublikasının iqtisadi inkişaf naziri F.Əliyevin başçılıq etdiyi nümayəndə heyəti ötən ilin dekabrında Almaniyada işgüzar səfərdə olmuşdur. Səfər zamanı Almaniyanın beynəlxalq aləmdə nüfuzlu “Hermes Kreditferzixerunq AG” təşkilatı ilə danışıqlar aparılmış və Azərbaycanın iqtisadiyyatına yönəldiləcək kreditlərin bu təşkilat tərəfindən sığortalanması məsələsi müzakirə edilmişdir.
Görüşdə “Hermes Kreditferzixerunq AG” təşkilatının rəhbərliyinə Azərbaycan Respublikası Prezidentinin başçılığı ilə Azərbaycanda aparılan iqtisadi islahatlar, investisiya və biznes mühitinin daha da yaxşılaşdırılması istiqamətində həyata keçirilən tədbirlər barədə ətraflı məlumat verilmiş, müvafiq sənədlər təqdim olunmuşdur.
Aparılmış danışıqların nəticəsi olaraq, “Hermes Kreditferzixerunq AG” təşkilatı 2002-ci il yanvarın 1-dən etibarən Azərbaycan Respublikasının kredit reytinqini artırmaq barədə qərar qəbul etmişdir. Başqa sözlə Azərbaycan MDB dövlətləri arasında Rusiya və Qazaxıstanla eyni, yəni 6-cı dərəcəli kredit reytinqinə malikdir. Azərbaycanın Türkiyə, Rumıniya kimi fəal ticarət tərəfdaşlarının kredit reytinqi də 6-cı dərəcədir.
Kredit reytinqinin artırılmasının nəticəsi olaraq Azərbaycan iqstiadiyyatına investisiya qoyacaq təşkilatların sərmayələri daha az məbləğlə sığortalanacaqdır. Bu isə Azərbaycan iqtisadiyyatına alman kapitalının cəlb edilməsinin surətləndirilməsinə imkan verəcəkdir.
Məlumat üçün qeyd edək ki, “Hermes Kreditferzixerunq AG” Almaniyanın ən iri kredit sığortalayıcısıdır və dünya kredit sığortası bazarının təxminən 40 faizinə malikdir.
Bölmənin digər xəbərləri
