İQTİSADİ VƏ TEXNİKİ ƏMƏKDAŞLIQ ÜZRƏ AZƏRBAYCAN-PAKİSTAN BİRGƏ KOMİSSİYASININ İKİNCİ İCLASI
Sentyabrin 2-4-də İslamabadda İqtisadi və Texniki Əməkdaşlıq üzrə Azərbaycan-Pakistan birgə komissiyasının ikinci iclası keçirilmişdir.
Azərbaycan baş nazirinin müavini, komissiyanın həmsədri Yaqub Eyyubovun başçılığı ilə respublikamızın nümayəndə heyəti iclasda iştirak etmişdir.
Komissiyanın həmsədri, Pakistanın özələşdirmə naziri Altaf M.Səlim iclası açaraq, Azərbaycan nümayəndə heyətini salamlamış, komissiyanın fəaliyyətinin ölkələrimiz arasında iqtisadi əlaqələrin inkişafı və daha da genişləndirilməsi üçün əhəmiyyətini vurğulamışdır. O, Pakistan iqtisadiyyatına dair ümumi məlumat da vermişdir.
Sonra respublikamızın nümayəndə heyətinin başçısı Yaqub Eyyubov çıxış edərək, Azərbaycan Prezidenti Heydər Əliyevin Pakistan xalqına və rəhbərliyinə səmimi salamlarını yetirmişdir. Son dövrdə Azərbaycan iqtisadiyyatında baş verən müsbət dəyişikliklərdən və əldə edilən uğurlardan danışan Y.Eyyubov ölkələrimiz arasında kənd təsərrüfatı, elm, təhsil, mədəniyyət, turizm və digər sahələrdə əməkdaşlığın genişləndirilməsinə ehtiyac duyulduğunu bildirmişdir.
Komissiyanın iclasında ticarət və gömrük, sənaye, nəqliyyat və kommunikasiya, elm, təhsil, səhiyyə və informasıya texnologiyaları, maliyyə və bank, kənd təsərrüfatı, mədəniyyət və turizm, neft və qaz, su təsərrüfatı, özəlləşdirmə, ekologiya və ətraf mühitin qorunması sahələri daxil olmaqla, bir çox məsələlər müzakirə edilmiş, həmin istiqamətlərdə əməkdaşlığın genişləndirilməsi yolları araşdırılmışdır. Komissiyanın işinin yekunu olaraq həmsədrlər tərəfindən protokol imzalanmışdır. Protokolda biznes sahəsində gələcəkdə görüləcək işlərin tənzimlənməsi məqsədi ilə ortaq Biznes şurasının təşkili, sənaye sahəsində sərmayə qoyuluşu və birgə müəssisələr yaradılması, kiçik və orta sahibkarlığın təşviqi, Azərbaycanda şəkər zavodlarının inşası imkanlarının araşdırılması, Bakıda Pakistan Milli Bankının törəmə bankının açılması və s. məsələlər barədə razılaşmalar öz əksini tapmışdır.
Komissiyanın üçüncü iclasının gələn il Azərbaycanda keçirilməsi qərara alınmışdır.
Səfər zamanı Azərbaycan baş nazirinin müavini Yaqub Eyyubov Pakistan İslam Respublikasının Prezidenti general Pərviz Müşərrəf tərəfindən qəbul edilmişdir. Y.Eyyubov Pakistan rəhbərinə Azərbaycan Prezidenti Heydər Əliyevin səmimi salamını və xoş arzularını yetirmiş, ölkəmizə rəsmi səfərə gəlmək barədə dəvətini çatdırmış, dövlətimizin başçısının məktubunu təqdim etmişdir.
Cənab Pərviz Müşərrəf onun dərin ehtiramını Prezident Heydər Əliyevə yetirməyi xahiş etmiş, Azərbaycana məmnuniyyətlə səfərə gələcəyini vurğulamış, eyni zamanda , dövlətimizin başçısını Pakistana rəsmi səfərə dəvət etmişdir.
Azərbaycan nümayəndə heyətinin başçısı Pakistanın xarici işlər naziri İnamül Haqq, maliyyə naziri Şövkət Əziz, ticarət, sənaye və istehsal naziri Əbdür Rəzzaq Davud, ərzaq, kənd təsərrüfatı və heyvandarlıq naziri Məhəmməd Cuneco, müdafiə katibi Həmid Nəvaz Xan, mədəniyyət, turizm, gənclər və idman məsələləri üzrə dövlət katibi ilə də görüşmüşdür. Respublikamızın kənd təsərrüfatı naziri İrşad Əliyev, gənclər, idman və turizm nazirinin birinci müavini Vaqif Əliyev də Pakistanlı həmkarları ilə görüşmüşlər.
Keçirilən bütün görüşlərdə Azərbaycan və Pakistan xalqları arasında qədim tarixə malik dostluq və qardaşlıq münasibətlərinin olduğu vurğulanmış, qarşılıqlı əlaqələrin daha da genişləndirilməsi üçün birgə səylərin artırılmasının vacibliyi bildirilmişdir.
Azərbaycan nümayəndə heyətinin üzvləri ölkəmizin Pakistandakı səfirliyində də olmuş, diplomatlarımızla görüşmüşlər.
Sentyabrın 4-də Azərbaycan səfirliyində rəsmi qəbul təşkil olunmuşdur. Qəbulda komissiyanın üzvləri, Pakistan hökumətinin, ictimaiyyətin, diplomatik korpusun nümayəndələri iştirak etmişlər.
Bölmənin digər xəbərləri
