İran BMT-nin insan hüquqları ilə bağlı hesabatını qeyri-obyektiv hesab edir
Tehran, 2 mart, AZƏRTAC
Rəsmi Tehran BMT-nin İranda insan hüquqlarının vəziyyəti ilə bağlı hazırladığı hesabatı qeyri-obyektiv və həqiqəti əks etdirməyən sənəd hesab edir.
AZƏRTAC xəbər verir ki, bu sözləri İranın Xarici İşlər Nazirliyinin rəsmi nümayəndəsi Bəhran Qasemi deyib. Bildirib ki, BMT-nin baş katibi Antoniu Quttereşin İranda insan hüquqlarının pozulması haqqındakı fikirləri heç bir həqiqəti əks etdirmir.
B. Qaseminin sözlərinə görə, insan hüquqları Qərb dövlətlərinin əlində bu və ya digər dövlətin daxili işlərinə qarışmaq üçün bir alətə çevrilib. Bu vasitə ilə müstəqil dövlətləri öz yolundan döndərməyə çalışırlar.
Hesabatın hansı mənbələrə əsasən hazırlandığı məlum deyil və qərəzli xarakter daşıyır. Yaxın Şərq bölgəsində baş verən münaqişələr nəticəsində milyonlarla insanın hüquqları hər gün kobudcasına pozulur. Lakin BMT ikili standartlardan çıxış edərək bu hüquq pozuntularına münasibət bildirmir.
B. Qasemi hesab edir ki, BMT bu hesabatı ABŞ-ın diktəsi ilə İrana təzyiq etmək üçün hazırlayıb.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
