Azərbaycanın mötəbər beynəlxalq tədbirə ev sahibliyi etməsi ölkəmizin nüfuzunu daha da yüksəldir - ŞƏRH
Bakı, 18 iyun, AZƏRTAC
Azərbaycan hazırda nüfuzlu beynəlxalq tədbirə ev sahibliyi edir. Bakıda iyunun 18-də İslam İnkişaf Bankı Qrupunun (İİBQ) 2026-cı il üzrə İllik Toplantılarının açılış mərasiminin keçirilməsi bunun əyani nümunəsidir. İİB Qrupuna üzv olan 60-a yaxın ölkə arasında iqtisadi əməkdaşlıq, davamlı inkişafın gücləndirilməsi istiqamətində müzakirələr aparılır.
Bu fikirləri AZƏRTAC-a açıqlamasında Milli Məclisin deputatı Samir Vəliyev söyləyib.
Deputat bildirib ki, İslam İnkişaf Bankı maliyyələşdirməni İslam prinsipləri əsasında aparan beynəlxalq maliyyə-kredit qurumlarından biridir. Üzvləri müsəlman ölkələridir. Bankın məqsədi üzv ölkələrin və fərdi müsəlman cəmiyyətlərinin iqtisadi inkişafını və sosial tərəqqisini İslam hüququ əsasında təmin etməkdir. Bankın əsas funksiyası iqtisadi və sosial inkişaf üçün layihələrin maliyyələşdirilməsi, müəssisələrin xüsusi kapitalında iştirak və ya investisiya qoyuluşu, qrantların və güzəştlərin verilməsi şəklində üzv dövlətlərə maliyyə yardımını təmin etməkdən ibarətdir. Azərbaycan İİB-lə əməkdaşlığa 1992-ci ildən başlayıb. 2007-ci ildə Bankın Azərbaycan üzrə yerli nümayəndəsi təyin edilib.
“İslam İnkişaf Bankı Qrupunun 2026-cı il üzrə İllik Toplantılarının Bakı şəhərində keçirilməsi barədə İslam İnkişaf Bankı Qrupunun Direktorlar Şurası 2025-ci il mayın 22-də qərar qəbul edib. Bununla əlaqədar “Azərbaycan Respublikasının İqtisadiyyat Nazirliyi tərəfindən təmsil olunan Azərbaycan Respublikası Hökuməti ilə İslam İnkişaf Bankı Qrupu arasında Azərbaycan Respublikası Hökuməti (ev sahibi ölkə) tərəfindən İİB Qrupunun 2026-cı ildə keçiriləcək illik toplantıları üçün təminatlara dair Anlaşma Memorandumu” imzalanıb. Prezident İlham Əliyevin 2025-ci il sentyabrın 8-də imzaladığı Sərəncamla İİB Qrupunun 2026-cı il üzrə illik toplantılarının Bakı şəhərində keçirilməsi ilə əlaqədar Təşkilat Komitəsi yaradılıb”, - deyə o xatırladıb.
Samir Vəliyev qeyd edib ki, İslam İnkişaf Bankı Qrupunun 2026-cı il üzrə İllik Toplantılarının açılış mərasimində iştirak edən Prezident İlham Əliyev dərinməzmunlu çıxış edib. Azərbaycanın müstəqillik illərində keçdiyi inkişaf yolundan bəhs edən dövlətimizin başçısı bəyan edib ki, müharibə, işğal, humanitar fəlakət, vətəndaş müharibəsi və digər çətinliklərlə səciyyələnən ilk iki ili istisna etməklə, qalan dövr ölkənin sabit inkişafı ilə yadda qaldı: “Bu isə hər hansı ölkənin uğuru üçün əsas ilkin şərtlərdən biridir. Sabitlik pozulduqda biz inkişaf haqqında heç danışa bilmərik. Beləliklə, sabitlik, yəni bu qrafikdə bu gün Azərbaycanın reallığını təşkil edən siyasi, iqtisadi və sosial sabitlik, nəinki, inkişafımızın əsas meyarıdır, o cümlədən regional inkişaf göstəricisidir. Çünki Azərbaycan regional və qlobal səviyyədə güclü əlaqələr sayəsində bir çox aspektlərdə artıq mühüm iştirakçıya çevrilib. Prezidentin vurğuladığı kimi, müstəqil xarici siyasətimiz beynəlxalq ictimaiyyətin güclü dəstəyini qazanıb. 155 ölkənin dəstəyi ilə Azərbaycanın BMT Təhlükəsizlik Şurasının üzvü seçilməsi, 120 ölkədən ibarət və BMT-dən sonra ikinci ən böyük beynəlxalq qurum olan Qoşulmama Hərəkatına sədrliyimiz və s. bunun göstəricisidir”.
Deputat diqqətə çatdırıb ki, Prezident İlham Əliyev toplantıda Ermənistanın işğalçılıq siyasəti və aparılan danışıqlar barədə də düşüncələrini söyləyib. “Müəyyən beynəlxalq güclər Azərbaycanı işğal faktı ilə barışdırmağa çalışsa da, dövlətimiz və xalqımız heç vaxt bunu qəbul etmədi. 2020-ci ildə 44 günlük Vətən müharibəsində və 2023-cü ildə keçirilmiş antiterror tədbirləri nəticəsində Azərbaycan öz ərazi bütövlüyünü və suverenliyini bərpa etdi. Azərbaycan müsəlman ölkəsi olduğu üçün işğalçılar qəsb etdikləri ərazilərdə İslam dəyərlərinə, abidələrinə qarşı vandalizm törədiblər.
Regional səviyyədə və qlobal səhnədə güclü əlaqələri ilə Azərbaycan bir çox aspektlər baxımından artıq mühüm iştirakçıya çevrilib. Müstəqil xarici siyasət sayəsində biz beynəlxalq ictimaiyyətin güclü dəstəyini qazandıq və dostlarımızın sayı ilbəil artır. Hazırda Azərbaycan bir sıra ölkələrin enerji təhlükəsizliyinin təmin olunmasında mühüm rol oynayır. Bu gün 16 ölkəyə Azərbaycan qazı ixrac edilir və onların 12-si Avropa ölkəsidir. Dövlətimizin başçısının vurğuladığı kimi, Azərbaycan qlobal enerji səhnəsində mühüm iştirakçıya çevrilib, genişmiqyaslı enerji infrastruktur layihələrinin təşəbbüskarı və həyata keçirən ölkə kimi çıxış edib. Azərbaycan Avrasiya bölgəsində bir çox ölkələri əhatə edən layihələr həyata keçirib və enerjiyə ehtiyacı olan ölkələrə yardım göstərib.
“Təbii qazın təchizatına gəldikdə, Azərbaycan bu gün boru kəməri qazının təchizatının coğrafiyası baxımından birinci yerdədir. Biz 16 ölkəyə təbii qaz təchiz edirik, bu say ilbəil artır və artmaqda da davam edəcək”, - deyən Prezident İlham Əliyev Azərbaycanın iqtisadi vəziyyətinə də toxunub və iqtisadi inkişafımızla bağlı hər hansı çətinliklər gözləmədiyimizi bəyan edib. Ölkəmizdə həyata keçirilən sosial proqramlara da toxunan dövlətimizin başçısı deyib: “Onlar genişmiqyaslı proqramlardır. Son bir neçə il ərzində biz bir sıra sosial dəstək paketlərini həyata keçirmişik”.
Hesab edirəm ki, Azərbaycanın daha bir mötəbər beynəlxalq tədbirə ev sahibliyi etməsi ölkəmizin beynəlxalq nüfuzunu daha da yüksəldir. Eyni zamanda, Azərbaycan İslam ölkələri ilə əlaqələrini əhəmiyyətli dərəcədə gücləndirəcək”, - deyə Samir Vəliyev vurğulayıb.
Bölmənin digər xəbərləri
