Martın 4-də Iran-Azərbaycan parlamentlərarası dostluq qrupunun rəhbəri Əliəsğər Şerdust başda olmaqla İran İslam Respublikası parlamentinin - İslam Şurası Məclisinin nümayəndə heyəti Bakıya gəlmişdir.

Martın 5-də İran parlamentinin üzvləri Şəhidlər xiyabanını ziyarət edərək, xalqımızın Azərbaycanın suverenliyi, müstəqilliyi və ərazi bütövlüyü uğrunda həyatlarını qurban vermiş cəsur oğul və qızlarının xatirəsini yad etdilər, onların məzarları üstünə gül-çiçək qoydular, ruhlarına dua oxudular.

Sonra nümayəndə heyəti Milli Məclisdə Azərbaycan - İran parlamentlərarası dostluq qrupu üzvləri ilə görüşdü.

Dostluq və işgüzarlıq şəraitində keçən görüşdə Milli Məclisin deputatları Eldar İbrahimov və Fəttah Heydərov Azərbaycan-İran münasibətlərinin tarixi kökləri və perspektivlərindən ətraflı söhbət açdılar. Hökumətlərarası müştərək iqtisadi komissiya uğurla fəaliyyət göstərməsi, ayrı-ayrı dövlət qurumları və parlamentlər arasında əməkdaşlığın inkişaf etməsi vurğulandı. Qonaqlara Milli Məclisin quruluşu və fəaliyyəti barədə də ətraflı məlumat verildi.

İran nümayəndə heyətinin rəhbəri Əliəsğər Şerdust qonaqpərvərliyə görə minnətdarlığını bildirərək dedi ki, parlamentlərarası əlaqələrin genişləndirilməsi digər sahələrdə də əməkdaşlığın inkişafına kömək edir. İki ölkənin xalqları arasında qardaşlıq münasibətlərini inkişaf etdirmək naminə əməkdaşlıq etmək bu gün Azərbaycan və İran qanunvericilik orqanlarına həmişəkindən daha zəruridir.

Əliəsğər Şerdust azərbaycanlı həmkarlarına İran parlamentinin quruluşu və fəaliyyətindən də danışdı.

Görüşdən sonra İran İslam Şurası Məclisi nümayəndə heyətinin üzvləri Azərbaycan parlamentinin növbəti iclasında iştirak etdilər.

Milli Məclisin sədri Murtuz Ələsgərov iclasa bir neçə dəqiqə fasilə verərək, iranlı qonaqları deputatlara təqdim etdi.

Daha sonra İran parlamentinin nümayəndə heyəti Milli Məclisin mədəniyyət məsələləri daimi komissiyasının üzvləri ilə görüşdü.

Səmimilik şəraitində keçən görüşdə komissiyanın sədri Anar Rzayev qonaqlara komissiyanın fəaliyyəti barədə ətraflı məlumat verdi. O, ölkənin Azərbaycan parlamentində mədəni həyatına dair qəbul olunmuş qanunlardan danışaraq bildirdi ki, hazırda çox mühüm qanun layihələrindən birinin - Milli Məclis tərəfindən birinci oxunuşda təsdiq edilmiş Azərbaycan dili haqqında Qanunun təkmilləşdirilməsi prosesi gedir.

Anar Rzayev ölkələrimiz arasında mədəni əlaqələri daha da genişləndirməyin vacibliyindən də danışaraq, bu sahədə iki ölkə parlamentləri üzvlərinin xüsusi rolunu vurğuladı.

Komissiyanın üzvləri - xalq şairi Bəxtiyar Vahabzadə və xalq artisti Zeynəb Xanlarova da İran-Azərbaycan mədəni əlaqələrinin indiki səviyyəsindən danışdılar.

İran parlament nümayəndə heyətinin rəhbəri Əliəsğər Şerdust səmimi sözlərə və dolğun məlumata görə azərbaycanlı həmkarlarına təşəkkür edərək dedi ki, onun ölkəsinin hökumət təşkilatlarında Azərbaycanla mədəniyyət sahəsində əməkdaşlığın inkişafına dair təkliflər işlənib hazırlanır və bu təkliflər Azərbaycan Prezidentinin İrana qarşıdakı səfəri zamanı ona təqdim olunacaqdır.

Qonaq Azərbaycan Yazıçılar Birliyinin üzvü olduğunu da xatırladaraq, yazıçıların qarşılıqlı səfərlərini təşkil etmək, habelə İran və Azərbaycan şairlərinin əsərlərini fars və Azərbaycan dillərində nəşr olunması təklifini irəli sürdü.

Elə həmin gün İran parlamenti nümayəndə heyəti Milli Məclisin insan hüquqları daimi komissiyasının üzvləri ilə görüşdü.

Komissiyanın sədri Sirus Təbrizli və digər deputatlar ölkədə cəmiyyətin demokratikləşdirilməsi sahəsində görülən işlər, insan hüquqlarının və söz azadlığının vəziyyəti barədə qonaqlara ətraflı məlumat verdilər. Bildirildi ki, ölkələrimizin qanunvericilik orqanları insan hüquqlarının təmin olunması sahəsində uğurla əməkdaşlıq edə bilərlər.

Iran parlamenti nümayəndə heyətinin rəhbəri Əliəsğər Şerdust islam hüququnun insan hüquqları ilə uyğunluğu, iki ölkə parlamentlərinin bu sahədə qanunvericilik proseslərində əməkdaşlığı məsələləri üzərində dayandı.

Görüşlərdə İranın Bakıdakı səfiri Əhəd Qəzai və Azərbaycanın Tehrandakı səfiri Abbasəli Həsənov iştirak edirdilər.