İRANIN HAVA LİMANLARININ BÖYÜK ƏKSƏRİYYƏTİ MODERNLƏŞDİRİLMƏLİDİR
İran mətbuatının məlumatına görə, ölkədəki 56 hava limanından 50-si müasir tələblərə cavab vermədiyindən ciddi surətdə modernləşdirilməlidir. İran İslam Respublikasının yollar və nəqliyyat naziri Əhməd Xürrəm bildirmişdir ki, hava limanlarının müasir naviqasiya avadanlığı ilə təchiz edilməsi üçün təxminən 1 milyard dollar lazımdır. O, İran mülki aviasiya parkının yeniləşdirilməsi prosesinin ləng getməsindən təəssüfləndiyini də bildirmişdir. Bu parkın əsasını hələ 1979-cu ildə alınmış 30 “Boinq” təyyarəsi təşkil edir və onu genişləndirməkdən ötrü milyonlarla əlavə kredit tələb olunur. Nazir köhnəlmiş avtomobil parkının yeniləşdirilməsinin zəruriliyi məsələsinə də toxunmuşdur. Onun sözlərinə görə, hazırda ölkədə 5,3 milyon avtomobil qeydiyyata alınmışdır. Yaxın altı ildə onların sayının 2 dəfə artacağı güman edilir. Əhməd Xürrəm dəmir yolu nəqliyyatından danışaraq demişdir ki, hazırda İranda 3,4 min kilometr dəmir yolu xətti çəkilir. Bu il alınmış 5 min yük və 50 sərnişin vaqonu yaxın vaxtlarda dəmiryolçuların ixtiyarına veriləcəkdir.
Bölmənin digər xəbərləri
