İRAQDA 12 NEPALLININ ÖLDÜRÜLMƏSİ İLƏ BAĞLI NEPALIN PAYTAXTINDA ETİRAZLAR DAVAM EDİR

01.09.2004 [15:48]
Çap et
A⁺ A^-

AZƏRTAC-ın İTAR-TASS agentliyindən aldığı məlumata görə, sentyabrın 1-də səhərdən Katmandunun mərkəzində bir neçə min nümayişçinin iştirak etdiyi etiraz aksiyaları davam edir. Polis onlara qarşı gözyaşardıcı qaz qumbaralarından istifadə etmək məcburiyyətində qalmışdır.

Ötən həftə İraqda 12 nepallı işçinin qətlə yetirilməsinə etiraz edən nümayişçilər öz vətəndaşlarını xilas edə bilmədiyi üçün krallığın hakim dairələrini fəaliyyətsizlikdə suçlamışlar. Daxil olan məlumatlarda bildirilir ki, Nepalın paytaxtında yeganə “Cümə məscidi” dağıdılmışdır. İğtişaşlar zamanı yaşayış evləri və xaricdə işləmək üçün nepallıları işə götürən şirkətlərin nümayəndəlikləri hücumlara məruz qalmışdır. Katmandunun bir sıra rayonlarında ictimai nəqliyyatın hərəkəti pozulmuşdur.

Nepal hökuməti öz vətəndaşlarının İraqda öldürülməsini “sivil normalara zidd vəhşilik aktı” adlandırmışdır.