İşğaldan azad edilmiş ərazilərə səfərin müddətinin uzadılması vətəndaşlara yeni imkanlar yaradır-ŞƏRH
Bakı, 9 iyul, AZƏRTAC
İşğaldan azad olunmuş ərazilərə son dövrlərdə vətəndaşlarımızın marağı getdikcə artır. Bu maraq həm orada əvvəllər yaşamış şəxslər, həm də həmin bölgələri görməmiş digər vətəndaşlar arasında müşahidə olunur. Vətəndaşların həmin bölgələrə səfər etmək - o torpaqlara ayaq basmaq, tarixi-mədəni irsimizi görmək, yaxından öyrənmək arzusu kifayət qədər güclüdür. Biz vətəndaş cəmiyyətinin – qeyri-hökumət təşkilatlarının nümayəndələri olaraq bu istəyi tez-tez eşidirik.
Bu fikirləri AZƏRTAC-a açıqlamasında “Vətəndaşların Sosial Rifahı Naminə” İctimai Birliyinin sədri İradə Rizazadə söyləyib.
Əvvəllər avtomobillə səfərlər üçün verilən icazə müddətinin iki günlə məhdudlaşmasının bəzi narahatlıqlara səbəb olduğunu deyən İ.Rizazadə artıq həmin müddətin beş günədək artırılmasının çox müsbət addım olduğunu, vətəndaşlar üçün əlavə imkanlar açdığını qeyd edib.
“Bu gün insanların həmin ərazilərə səfəri bölgənin inkişafı baxımından mühüm əhəmiyyət daşıyır. Bu məqsədlə icazə prosedurları, səfər qaydaları, otel yerləşmə məsələləri getdikcə sadələşdirilir. Yeni qəbul edilmiş dəyişikliklərə əsasən, artıq vətəndaşlarımız azad olunmuş bölgələrdə beş günədək səfərdə qala bilərlər. Bu da onlara həmin əraziləri daha ətraflı görmək, tanımaq və dərk etmək imkanı verir. Səfər zamanı otellərdə qalmaq üçün əlavə icazə prosedurlarına da ehtiyac qalmır. Həmin beşgünlük müddət ərzində azad olunmuş ərazilərdə qalmaq da qanuni və avtomatik həyata keçirilir. Yəni, vətəndaşların həmin otellərdə qalması üçün əvvəlcədən rezervasiya etmələri də mümkündür, ya da yerindəcə bu qərarı verə bilərlər. Hətta vətəndaşların səfərlərinin necə təşkil olunacağı məsələsində də onlara yerindəcə dəstək göstərilir. Səfərin planlaşdırılması, marşrutların müəyyənləşdirilməsi, görüləcək yerlərlə bağlı ilkin məlumatların verilməsi baxımından otel əməkdaşları tərəfindən vətəndaşlara yardım olunur. Bundan əlavə, əgər vətəndaş işğaldan azad olunmuş ərazidə fəaliyyət göstərən oteldə əvvəlcədən rezervasiya edibsə, əlavə olaraq bir daha icazə üçün müraciət etməyinə ehtiyac qalmır. Giriş icazəsi artıq otel tərəfindən təmin olunur. Bu isə prosesi hüquqi və texniki baxımdan daha əlçatan və çevik edir. İnsanların öz şəxsi minik avtomobilləri ilə həmin ərazilərə gedə bilməsi də əlavə rahatlıq yaradır. Bütün bunlar da dövlətin vətəndaş rahatlığı baxımından atdığı mühüm addımlardan biridir və əhalinin istəyini nəzərə almağın, onların səsini, fikirlərini eşitməyin bariz nümunəsidir”, - deyə o diqqətə çatdırıb.
İradə Rizazadə bildirib ki, bütün bunlar turizmin inkişafına dəstək verməklə yanaşı, həm də sahibkarlığın genişlənməsi baxımından böyük əhəmiyyət daşıyır: “Artıq bir çox sahibkarlar da bu ərazilərə maraq göstərirlər və belə gözəl bölgələrimizdə biznes infrastrukturunun yaradılması üçün təşəbbüslərlə çıxış edirlər. Azərbaycan dövləti də onlara bu prosesdə dəstək olur. Məqsəd odur ki, insanlar bu torpaqlarda rahat şəkildə yaşaya bilsinlər və orada həyat tədricən öz axarına qayıtsın. Eyni zamanda qeyd etmək lazımdır ki, turizmin və sahibkarlığın inkişafı doğma torpaqlarına qayıdan məcburi köçkünlərimiz üçün də yeni imkanlar yaradır. Bu ərazilərdə həyata keçirilən layihələr nəticəsində onlardan bir çoxu öz vətənlərində işlə təmin olunurlar. Bu isə, əlbəttə ki, bölgədə yaşayan əhalinin sosial rifahının yüksəldilməsinə və dayanıqlı məskunlaşmanın təmin olunmasına mühüm töhfə verəcək”.
Onun sözlərinə görə, bütün bunlara baxmayaraq məhdudiyyətlər hələ ki, davam etməlidir. Bu, vətəndaşların sağlamlığı və təhlükəsizliyi baxımından ən vacib şərtlərdən biridir: “Düzdür, zaman keçdikcə azad edilmiş ərazilərə giriş üçün icazə prosedurları sadələşdirilir. Lakin icazələrin verilməsi, məhdudiyyətlərin saxlanılması mütləqdir. Çünki bu, ilk növbədə, insanların təhlükəsizliyinin təmin olunması baxımından son dərəcə vacibdir. Əlbəttə, təhlükə hələ də var – xüsusilə mina təhlükəsi. Lakin artıq bəlli ərazilər var ki, həmin yerlər tam şəkildə mina təmizləməsindən keçib. Düzdür, vətəndaşlar bu barədə maarifləndirilir, təhlükələr və davranış qaydaları haqqında onlara ətraflı məlumatlar verilir. Amma hər birimiz bilirik ki, bütün bunlara baxmayaraq bəzi hallarda arzuolunmaz hadisələr də baş verir. Məsələn, vətəndaş öz minik avtomobili ilə əraziyə daxil olur, lakin müəyyən qaydalara laqeyd yanaşdıqda bu, çox acı nəticələrə səbəb olur. Çünki mina təhlükəsi hələ də tamamilə aradan qalxmayıb. Sadəcə, məsələ ondadır ki, insanlar təhlükələrin fərqində olmalı və özlərinin, yaxınlarının həyatlarını qorumaq üçün bütün zəruri tələblərə ciddi şəkildə əməl etməlidirlər”.
Bölmənin digər xəbərləri
