İslandiyada “Cəhənnəmin qapıları” açılır
Bakı, 7 iyul (AZƏRTAC). Vulkanoloqlar İslandiyanın qədim zamanlardan “Cəhənnəm qapıları” adlandırılmış ən fəal vulkanlarından biri sayılan Heklanın püskürəcəyi barədə xəbərdarlıq etmişlər. İslandiya Universitetinin geofiziki Pall Eynarsson demişdir ki, Hekla son iki-üç gün ərzində xeyli fəallaşmışdır.
Yeri gəlmişkən, dünyaya səs salmış Eyyafyatlayokudl vulkanının yanında yerləşən Hekla vulkanı son minillikdə 20 dəfədən çox püskürmüşdür. Sonuncu püskürmə 2000-ci fevralın 26-da baş vermişdir.
Heklanı məşhurlaşdıran cəhət budur ki, onun püskürməsinin davamlılığını və gücünü irəlicədən görmək mümkün deyildir. Hekla bir neçə gündən tutmuş bir neçə ay sürəkli püskürə bilər. Məsələn, 1947-ci il martın 29-da başlamış püskürmə 1948-ci ilin aprelində başa çatmışdı. Vulkanoloqlar xatırladırlar ki, 2000-ci ildə Hekla ilk külünü püskürməmişdən 1,5 saat əvvəl oyanmış, 1970-ci ildə oyanma prosesi başlanandan 25 dəqiqə sonra püskürməyə başlamışdır.
Bölmənin digər xəbərləri
