İstilərlə əlaqədar hidrometeoroloqlar operativ iş rejiminə keçmişlər
Bakı, 29 iyul (AZƏRTAC). Son günlər respublikada maksimal temperatur çoxillik norma ilə müqayisədə 5 dərəcəyədək artmış, Bakı və Abşeron yarımadasında 40-41, bəzi mərkəzi aran rayonlarında və Naxçıvan Muxtar Respublikasında 41-42 dərəcə isti müşahidə olunmuşdur.
Ekologiya və Təbii Sərvətlər Nazirliyi Milli Hidrometeorologiya Departamentindən AZƏRTAC-a verilən məlumata görə, yüzillik meteoroloji müşahidələr göstərir ki, ölkə ərazisində ən yüksək temperatur 2000-ci ildə qeydə alınmışdır. Həmin il avqustun əvvəlində havanın temperaturu Naxçıvan Muxtar Respublikasında 46 dərəcə, Mərkəzi Aran rayonlarında isə 43 dərəcə olmuşdur.
Anomal isti hava şəraiti ilə əlaqədar departament əməkdaşları Bakıda və Abşeron yarımadasında yerləşən hidrometeoroloji stansiyalarda operativ iş rejiminə keçərək hər saatdan bir maksimal temperatur üzərində müşahidələr aparır.
Eyni zamanda, iyulun 21-dən 28-dək gözlənilən anomal istilər haqqında xəbərdarlıq bütün əlaqədar təşkilat və informasiya vasitələrinə verilmişdir.
İyul ayının üçüncü ongünlüyündə Şimali Afrikadan qızmar tropik hava kütlələrinin ölkə ərazisinə daxil olması üçün əlverişli şərait yaranmışdır. Bu səbəbdən yaxın günlər ərzində hava şəraitində mühüm dəyişiklik gözlənilmir.
Bölmənin digər xəbərləri
