İSTİNTAQ RUSİYA MÜLKİ TƏYYARƏLƏRİNİN QƏZAYA UĞRAMASININ BİR NEÇƏ EHTİMALINI NƏZƏRDƏN KEÇİRİR

25.08.2004 [18:29]
Çap et
A⁺ A^-

AZƏRTAC-ın İTAR-TASS agentliyindən aldığı xəbərə görə, istintaq Rusiya mülki təyyarələrinin avqustun 24-də gecə qəzaya uğramasının bir neçə ehtimalını nəzərdən keçirir və terror aktını əsas ehtimal kimi götürmür. Bunu agentliyin müxbirinə faciənin səbəblərini hadisə yerində - Tula və Rostov vilayətlərində araşdıran birgə əməliyyat-istintaq briqadasının nümayəndələri bildirmişlər.

Xüsusi xidmət orqanlarının nümayəndəsi demişdir ki, hazırda araşdırılan ehtimallar arasında insan amili, texnikanın nasazlığı, yanacağın keyfiyyətsizliyi, hava şəraitinin pis olması və bir sıra digər amillər də var. Hər iki təyyarənin parçaları yoxlanılarkən aşkar partlayış əlamətlərinin olmamasına baxmayaraq, terror aktı ehtimalı ciddi araşdırılır. RF Federal Təhlükəsizlik Xidmətinin ictimai əlaqələr mərkəzinin rəisi Sergey İqnatçenko xüsusi vurğulamışdır ki, TU-134 və TU-154 təyyarələrinin düşdükləri yerlərdə terror aktları izləri hələlik aşkara çıxarılmayıbdır. Bunu təyyarələrin parçalarının tədqiqi də göstərmişdir.

Domodedovo hava limanının dəqiqləşdirilmiş məlumatına görə, iki təyyarənin qəzaya uğraması nəticəsində 89 nəfər həlak olmuşdur.