İsveç bu yay toy bumu yaşayır
Stokholm, 29 avqust, Nərgiz Cəfərli, AZƏRTAC
2025-ci ilin yayını artıq İsveçdə “sevgi yayı” adlandırırlar. Ziyafət salonları həddindən artıq dolub, toyların sayı isə rekord qırır.
AZƏRTAC xəbər verir ki, sosioloqların fikrincə, bu, həm pandemiya səbəbindən təxirə salınan mərasimlər, həm də daha dərin mədəni-psixoloji tendensiyalarla əlaqədardır. Müharibələr, iqlim böhranı və iqtisadi qeyri-sabitlik şəraitində insanlar sakitlik və müəyyənlik axtarır, bunu isə nikahda tapırlar.
Nikahın populyarlığı onu münasibətlərin sonu kimi deyil, yeni bir yolun başlanğıcı kimi təqdim edən İsveç realiti-şoularının təsiri altında artır.
Eyni zamanda, ənənəvi rollara - qadının yumşaqlığı və evdəki rolunun ideallaşdırıldığı “soft girl” və “trad wife” tendensiyalarına qayıdış müşahidə edilir.
Sosioloqlar xəbərdarlıq edirlər ki, ənənəvi rollara qayıdış təhlükəli münasibətlərdən çıxış imkanını çətinləşdirə bilər.
Eyni zamanda, nikahların sayının artması doğum nisbətinin çoxalması ilə müşayiət olunmur. Nikah getdikcə daha çox uşaqlara aparan bir yol deyil, hüquqi və ya emosional birlik kimi nəzərdən keçirilir. İqtisadi qeyri-sabitlik, mənzil problemləri və iqlim həyəcanı gənc cütlüklərə ailəni planlaşdırmağa mane olur.
Sosioloqlar qeyd edirlər ki, bəlkə də iş nikahın özündə deyil, sevginin əsas yer tutduğu günün təşkilindədir.
Bölmənin digər xəbərləri
